भांगरभूंय | प्रतिनिधी
शाळा बंद केल्यार भाग शिक्षणाधिकारी कार्यालयांत मोर्चा व्हरपाची पालकांची शिटकावणी
सांगें : पंदरा दीस पयलीं वालकिणी शाळेंत शिक्षक नाशिल्ल्यान 10 दीस गांवच्या तरणाट्यान शिक्षणाचे धडे दिले. ही परीस्थिती भांगरभूंय/ गोवनवार्ता दिसाळ्यां वरवीं दोळ्यां फुडल्यान हाडिल्ल्यान दुसरे दिसा हे शाळेंत शिक्षक धाडलो. अशीच परिस्थिती सध्या कुमारी भाटी हांगा निर्माण जाल्या. निमाणें हांगा भाग शिक्षणाधिकार्याक वर्ग घेवचो पडलो. ही खबर ताजी आसतनाच मावळिंगें सांग्यार पंदरा दीस जाले शिक्षकूच नाशिल्ल्यान फक्त माध्याम आहार खावन भुरग्यांक घरची वाट धरपाची पाळी आयल्या. शिक्षण खातें शाळा बंद उडोवपा खातीर भुरग्यांच्या शिक्षणाकडेन खेळपाचीं नाटकां करता असो आरोप थळाव्यांनी केला.
शाळेंत भुरगीं उणीं आसात. पूण फुडल्या वर्सा भुरग्यांचो आंकडो वाडटलो. ताका लागून सध्या पेरा टिचर धाडून भुरग्यांक शिकोवचें, अशी मागणी गांवच्या लोकांनी केल्या.
जर भाग शिक्षणाधिकार्यांनी हाचेर भर दिलीना जाल्यार कार्यालया मुखार मोर्चा व्हरतले अशी शिटकावणी पालकांनी केल्या.
आयज प्रतिनिधी उंचेल्या शिक्षणाच्यो बढायो मारता. आयज बालवाडी, मुळाव्या शाळांची परिस्थीती खूब वायट जाल्या. सरकारान मुळाव्या शिक्षणाचेर पयलीं भर दिवची. उपरांत उच्च शिक्षणाच्यो फोगोट्यो बंद करच्यो अशेंय गांवच्या पालकांनी सांगलें.
ह्या वेळार शोभा गांवकार हांणी, आमी शाळेविशीं भाग शिक्षणाधिकार्यां कडेन उलयल्यांत. पूण तो आमचें आयकून घेना. आयज बंद पडिल्ल्यो शाळा कितल्योश्योच आसात. त्यो परत सुरू जाल्योना. ती परिस्थिती हे शाळेचेर येवची न्हय म्हणून आमी शाळा चालू उरची हे खातीर मागणी करतात.
सिया गांवकार हांणी, दिवाळे उपरांत तरी शिक्षक दिवचो. जर शिक्षक धाडूंक ना जाल्यार पालक वर्ग आनी गावचे लोक मोर्चा काडटले. सरकारान भुरग्यांच्या फुडाराचो विचार करचो अशें गांवकार हांणी सांगलें.
मुख्यशिक्षणाधिकारी भुरग्यांक दुसरे शाळेंत घालात अशें सांगतात. ते खातीर शाळेंत यो-वच करपाक गाडयेक दिसाक 60 रुपया दितां. भाग शिक्षणाधिकारी आमचीं फकांडां करता. हें ताणीं हांगां थांबोवन भुरग्यांच्या फुडाराचें चितून हे शाळेक शिक्षक दिवचो. – बिंदीया गांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
