भांगरभूंय | प्रतिनिधी
भांगरभूंय । प्रतिनिधी
म्हापशेंः परवाने घेनास्तना जायते लोक वेवसाय करतात. ते खातीर तांका कारवायेक तोंड दिवचें पडटा. जायते फावट परवान्याचें नूतनीकरण करपाचें तशेंच रावता. हे प्रकार म्हणल्यार तसो व्हडलो गुन्यांव न्हय. मात मायकल लोबो हें एक राजकीय प्रस्थ आनी विरोधी पक्ष फुडारी आशिल्ल्यान तांच्या हॉटेलांचो प्रश्न प्रसार माध्यमांनी गाजता अशें म्हापश्याचो आमदार जोशुआ डिसोझा हांणी म्हणलां.
मायकल लोबो हांचेर कारवाय करपाची जाल्यार ती राजकीय कारणा खातीर गाजता. साबार वेवसायिकांचेर अशी कारवाय करतात तेन्ना ताका प्रसिद्धी मेळना. वेवसायाची कागदपत्रां सारकीं आसल्यार कोणे कोणाक कित्याक भिवेवपाक जाय अशें तांणी मंगळारा म्हापश्यांत एके कार्यावळी वेळार पत्रकारां कडेन उलयतना सांगलें.
कायदो सगल्यां खातीर आसा. सरकार कोणाक वेंचून काडून ताका लक्ष्य करना. सगल्या रेस्टॉरंटवाल्यांनी कायद्याक पाळो दिवन वेवसाय करपाकज जाय. कागाळ आयल्यार संबंदीत सरकारी यंत्रणेक कारवाय करपाचो अधिकार आनी मेकळीक आसा. कागाळ केल्ल्यान लोबो हांच्या आस्थापनांची चवकशी चल्ल्या आसुए अशें तांणी सांगलें. मायकल लोबो भाजपात येतलो कांयना हे विशीं म्हाका कांय कल्पना ना. भाजपात आतां येवपाचें आसल्यार ते पक्ष सोडून काँग्रेस पक्षांत कित्याक गेलो, असो जोशुआचो प्रश्न आसा. राजकीय निर्णय घेतल्यार ताचे परिणामूय जतात. भाजपा सोडप ही घडये लोबो हांची रणनिती आशिल्ली. ते विशीं म्हाका कांय सांगपाचें ना, अशें तांणी सांगलें.
बॉक्स-
मायकल लोबो विरोधी पक्ष फुडारी आशिल्ल्यान सरकार तांकां लक्ष्य करता अशें जायते जाणाक दिसपाक शकता. मात हेर लोकूय असले चवकशीतल्यान वतात. लोबो राजकारणी आशिल्ल्यान तांचे संबंदी जें कितें चल्लां ताका प्रसार माध्यमां चड प्रसिद्धी दितात- आमदार जोशुआ डिसोझा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
