भांगरभूंय | प्रतिनिधी
-शिक्षण खात्याच्या पालवान पालकांचे जातलें समुपदेशन
पणजी: कळंगूटे सुशिक्षीत बायले कडल्यान आपल्याच पुताचो खून करपाचे घडणुके उपरांत सामान्य लोकां सयत दोतारांकूय धपको बसला. सुशिक्षित आनी वरिश्ठ पदा वयल्या बायले कडल्यान कांयच गुन्यांव नाशिल्ल्या चार वर्सांच्या भुरग्याचो खून जावप ही गजाल धपको दिवपी आसा. मानसीक संतुळन इबाडले उपरांतूच अशी भिरांकूळ कृती जावप शक्य आसा. ते खातीर लोकांचे मानसीक समुपदेशन करपाचो निर्णय भारतीय वैजक संघटणेच्या (आयएमए) गोंय फांट्यान घेतला.
शिक्षण खात्याच्या सहकार्यांन विद्यार्थ्यांच्या पालकांचे समुपदेशन जातले. मानसोपचार तज्ञ आनी समुपदेशकांच्या मजतीन दोतोर समुपदेशन करतले. हाचे खातीर आयएमएन शिक्षण खात्या कडेन संपर्क केला. पयल्या पांवड्यार विद्यार्थ्यांच्या पालकांचें समुपदेशन जातलें. शिक्षण खातें, विद्यालयां तशेंच विद्यार्थ्यां वरवीं चडांत चड लोकांचें समुपदेशन जावप शक्य आसा.
समाज तशेंच मनशाचे उदरगतींत मानसीक स्थिती वा मानसीक भलायकेक बरेच म्हत्व आसा. मानसीक संतुलन इबाडले उपरांत लिंगीक अत्याचार, हिंसा, मारपेट, आत्महत्या अशे प्रकार जावपाचीं शक्यताय आसता. समाज तशेंच मनशाचें मानसीक संतुलन वा मानसीक भलायकी बरी दवरपा खातीर यत्न जावपाची गरज आसा. हे फाटभुंयेर आयएमए ह्या वर्सा हो उपक्रम करतली.
समाजांत आयज शिक्षणाचें प्रमाण वाडलां. दुरचित्रवाणी, संगणक, मोबायल हातूंत बरेच लोक घुस्पटून उरतात आनी शेजारी आनी इश्टांक विसरतात. एकामेका कडेन प्रत्यक्ष उलोवप, दुसऱ्याच्या घरा वचप, हातूंतल्यान मनरिजवण जाता. ताण उणो जाता. आयच्या स्पर्धात्मक जिणेंत कामाचो ताण उणो करपा खातीर मनरिजवण वा विधायक कार्य करपाची गरज आसा, अशें डॉ. शेखर साळकार हांणी सांगलें.
कळंगूटे सारकी घडणूक फुडें जावपाक जायना, म्हूण समाजाच्या सगल्या वाठारांतल्यान यत्न जावपाक जाय. सामाजीक बांदिलकेच्या नात्यान आयएमएन समाजाचें समुपदेशन करपाचें थारायलां. सगळ्यांचे सहकार्य मेळ्ळें, जाल्यार हे शक्य जातलें, अशें आयएमएन स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
