भांगरभूंय | प्रतिनिधी
केपें: मानगाळ केपेंचे न्हंयेचेर नुस्तें मारपाक गेल्ले नुने नेत्रावळीचे दोग तरणाट्यांक बुडून मरण आयलें. केपें पुलिसांनी उजो पालोवपी दळाच्या जवानांचे मजतीन कुडी भायर काडल्यो.
केपें पुलिसांनी दिल्ले म्हायती प्रमाण नुने नेत्रावळीचे पांच तरणाटे नुस्तें मारपा खातीर 1 जानेवारीक कासवांकोंड मानगाळ न्हंयेचेर गेल्ले. पांचांतले सतीश गांवकार (36) आनी भिसो गांवकार (43) दोग जाण परतून येवंक नाशिल्ल्यान तांकां सगळे कडेन सोदले. सांजेच्या 4 वरांच्या सुमाराक केपें पुलिसांक हे विशीं म्हायती दिली. ते उपरांत पुलिसांनी कुडचडें उजो पालोवपी दळाचे मजतीन न्हंयेंत सोद मोहीम सुरू केली. त्या वेळार दोगांच्योय कुडी सांपडल्यो.
न्हंयेच्या उदकाचो अदमास येवंक नाशिल्ल्यान आनी खडपाचे खांचीक सांपडिल्ल्यान दोगांकूय मरण आयिल्लें आसपाक जाय, असो अदमास उक्तायतात. तांच्यो कुडी भायर काडले उपरांत पोस्टमार्टमा खातीर धाडून दिल्यो. केपें पुलीस हे घडणुकेचो निरिक्षक दीपक पेडणेंकार हांच्या मार्गदर्शना खाला फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
