भांगरभूंय | प्रतिनिधी
पणजी : केंद्रीय साहित्य अकादेमीचे 2022 चे अणकार पुरस्कार जाहीर जाल्यात. कोंकणी, हिंदी आनी मैथिली भाशांचे पुरस्कार पयलीं जाहीर केल्यात.
कोंकणींत ज्येश्ठ साहित्यीक माणिकराव नायक गावणेंकार हांकां श्री रामकृष्ण अमृतवाणी (भाग 1 आनी 2- दरेकी 3 भागांनी) ह्या पुस्तका खातीर पुरस्कार फावो जाला. हें बंगाली निबंधाचें पुस्तक. नांव श्री श्री रामकृष्ण कथामृत. तें महेंद्रनाथ गुप्ता हांणी बरयलां.
हिंदी भाशेचो अणकार पुरस्कार गौरी शंकर रैना हांकां काश्मीर की प्रतिनिधीक कहाँनियां मेळ्ळा. तांणी साबार लेखकांच्या काश्मीरी लघुकथा ह्या पुस्तकाचो अणकार केला. तर मैथिलींत आझादी ह्या पुस्तका खातीर रत्नेश्वर मिश्रा हांकां पुरस्कार फावो जाला. तांणी चमन नहाल हांच्या आझादी ह्या इंग्लीश कादंबरीचो अणकार केला.
दरेके भाशे खातीर तीन वांगड्यांची समिती आशिल्ली. हिंदी आनी कोंकणी अणकार पुरस्कारांची एकमतान निवड जाली. मैथिली पुरस्कार सगल्यांत चड दोन मतां मेळपी पुस्तकाक दिलो. कोंकणी खातीर रमेश बाबय कोमरपंत, प्रो. डाॅ. सु. म. तडकोडकार आनी डाॅ. जी. संध्या नायक हांणी परिक्षण केलें.
50 हजार रोख आनी तांब्याचें मानचिन्न अशा स्वरुपाचो हो पुरस्कार फुडल्या वर्सा दितले, अशें अकादेमीचे सचीव के. श्रीनिवासराव हांणी कळयलां.
माणिकराव हे कोंकणी चळवळींतले एक वावुरपी. शांतपणान कार्य करपी व्यक्तीमत्व. अ. भा. कोंकणी परिशदेचे ते भांडारी आशिल्ले. तांणी साबार पुस्तकां बरयल्यांत. तांणी 1600 पानांचें रामायण कोंकणीत बरयलां. शस्त्रक्रिया जाल्ल्यान दोळ्यांनी कमी दिसता. ताका लागून तांणी लेखनीक दवरून रामायण बरयलें. वाल्मिकी रामायणाचे चार भाग. भक्ती पदां, स्वामी विवेकानंदाचेर भक्तीयोग, कर्मयोग अशीं बरींच पुस्तकां तांणी बरयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
