भांगरभूंय | प्रतिनिधी
भारताचो मल्ल रवी दाहियान दादल्यांच्या 57 कील वजन फ्री स्टायल गटांत भांगरा पदक जिखलें. ताणें नायजेरियाच्या एबिकेवेनिमो वेल्सन आड जबरदस्त कामगिरी करीत 10-0 फरकान जैत जोडलें.
रवी दाहियान सुरवाती पसून आक्रमक खेळ करीत प्रतिस्पर्धी मल्लाचेर पकड घट करपाचो यत्न केलो. ताका संद मेळना फुडें रवीन गटरेज डाव खेळत पयले फेरयेंत 8 गूण मेळयले. ते उपरांत ताणें दुसऱ्या सत्रांत उरिल्ले दोन गूण मेळयत तंत्रीक आदाराचेर मॅच 10-0 फरकान जिखली.
बॉक्सर जास्मिनाक कांशें
बायलांच्या 57-60 कील वजनाच्या लायटवेट बॉक्सींग प्रकारांत जास्मिनान भारताक आनीक एक पदक जिखून दिलें. तिका सेमी फायनलींत हार घेवची पडली, ताका लागून तिका कांश्या पदकाचेर समाधान मानचें पडलें. भारताचें हें 30वें पदक थारलें.
सेमी फायनलींत जास्मिनाक इंग्लंडाचे जेमा रिचर्डसनान 3-2 फरकान हारयली. मॅच सामकी उमळशीक वाडोवपी थारली. अखेरेक फक्त एका गुणाच्या फरकान जास्मिनाक हार घेवची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
