भांगरभूंय | प्रतिनिधी
मडगांव, प्रतिनिधी ःरातीं पोरणें बाजारांतल्या ‘ए वन खान’ तंदुरी स्टॉलाचेर पयशांच्या देण्या – घेण्या वयल्यान झगडीं जाली तेन्ना स्टॉलाचो धनी मुसीफुल्ला ऊर्फ लालू खान हांचेर फारपेट करपाची घडणूक घडली. ह्या प्रकरणांत दुबावीत रसेल डिसोझा हाका फातोर्डा पुलिसांनी आयज सकाळीं अटक केल्या. ताचे आड फारपेट आनी शस्त्र कायद्या खाला गुन्यांव नोंद केला. अंदूं कार्नावालांत रसेल ‘किंग मोमो’ जाल्लो.
बिरेस्तारा रातीं रसेलान तंदुरी स्टॉलाचेर वचून लालू खान हांचे कडेन पयश्यां विशीं चर्चा सुरु केली. उलयतना अर्थीक वेव्हारा वयल्यान बोवाळ वाडलो. लालूच्या दुकाना लागसार रसेल रेस्टॉरंट चलयता. मागीर भायर वचून मोबायलाचेर उलयतना रसेलान अचकीत पिस्तुल काडून लालूचेर नेम धरलो आनी फार मारलो. लालू थंयच्यान पळून गेल्ल्यान वांचलो. उपरांत रसेलान रेस्टॉरंटांत चिकन पुरवण करपी नईमाचेर गुळी मारली. पूण नईम कुशीक सरिल्ल्यान वाटावलो. उपरांत डिसोझान तिसरी गुळी रेस्टॉरंटाचे वटेन मारली आनी मागीर धेंपां उडयत तो थंडपणान थंय सावन गेलो. अशें लालूच्या भावान सांगलें.
पुलिसांक थंय दोन गुळयांचे शेल मेळ्ळ्यांत. फारपेट प्रकरणांत फातोड्डें पुलिसांनी दुबावीत रसेला आड गुन्यांव नोंद केला. पुलीस निरिक्षक दितेंद्र नायक हांच्या मार्गदर्शना खाला फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
