भांगरभूंय | प्रतिनिधी
मडगांव पालिकेचे मुख्याधिकारी आग्नेल फर्नांडीस हांची बदली जाल्यान तांकां पालिका कर्मचाऱ्यांनी निरोप दिलो. ह्या निरोप सुवाळ्यांत कर्मचाऱ्यांनी तांकां भेटवस्त दिवन तांचो भोवमान केलो.
ह्या वेळार माचयेर नगराध्यक्ष लिंडन परेरा, उपनगराध्यक्ष दीपाली सावळ आनी नवे मुख्याधिकारी रोहित कदम हाजीर आसले.
नगराध्यक्ष परेरा हांणी ह्या वेळार उलयतना फर्नांडीस हांणी पालिकेंत आपलीं कामा घेवन आयिल्ल्यांक केन्नाच ‘ना’ म्हणलें ना म्हणपाचें सांगलें. ते सगल्यांक बरें सहकार्य दिताले अशें तांणी सांगलें.
म्हाका पालिका कर्मचारी आनी पालिका मंडळाचें बरें सहकार्य मेळ्ळें देखून पालिकेंत काम करप शक्य जालें. हांवें पालिकेंत काम घेवन आयिल्ल्याक सदांच न्याय दिवपाचो यत्न केलो. कोणाक केन्नाच त्रास केलो ना अशें आग्नेल फर्नांडीस हांणी सांगलें.
पालिकेंत कांय कामां अडचणीक लागून जावपाचीं उरल्यांत तीं नवे मुख्याधिकारी पूर्ण करतले. म्हजेर कांय प्रमाणात दबाव आसलो देखून कामां करपाक अडचणी येताल्यो हें तांणी मान्य केलें.
पालिका अभियंते विशांत गांवकार हांणीय आपले विचार मांडले. कार्यावळीचें सुत्रसंचालन साईश सातार्डेकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
