भांगरभूंय | प्रतिनिधी
गोंयकारांच्यो नदरो महाराष्ट्राच्या राजकारणा कडेन अजूनय लागिल्ल्यो आसात. मुंबयंतच न्हय महाराष्ट्राच्या साबार वाठारांनी शिक्षण, वेवसाय, उद्देगा निमतान सगल्या धर्माच्या गोंयकारांचो राबितो आसा. जें गोंयच्या राजकारणांत फाटलीं दोन दसकां घडलें तेच वाटेर आयज महाराष्ट्र आसा. प्रादेशीक पक्षांच्या अस्मितायेचें झूज महाराष्ट्रांत सुरू जालां. शिवसेना, राष्ट्रवादी काँग्रेसीचे दोन कुडके फुडारांत एक जावचे ना अशें न्हय. राजकी पक्षाच्या अध्यक्षांनी वेळार दुसरें नेतृत्व घडयलें ना आनी ताचे परिणाम पक्षाचे दोन कुडके. काँग्रेसींत जें घडलें ताच्याय फुडलें राष्ट्रवादी काँग्रेसींत घराब्यांतच घडलें. शिवसेना फुटली ती मुख्यमंत्री जावपाच्या हावेसान. तेंको पक्षनिश्ठ भारतीय जनता पार्टीचो. हांव परतो येतलों अशें हांसत हांसत सांगपी देवेंद्र फडणवीस महाराष्ट्राच्या मुख्यमंत्रीपदा मेरेन पावल्यात. महाराष्ट्रांत भाजपा सिंगल लार्जेस्ट पार्टी म्हूण वेंचून आयल्या, केंद्रातय भाजपा सरकार. ते खातीर फडणवीसांची वाट सोंपी. मुख्यमंत्रीपद सोडून उपमुख्यमंत्रीपदार रावन फडणवीस हांणी जें राजकारण केलें तें अणभव, शिक्षण, पिरायेच्या बळग्यार.
मुख्यमंत्री डाॅ. प्रमोद सावंत आनी मंत्रीमंडळ वांगड्यांचो महाराष्ट्राच्या राजकी बदलांत व्हड वांटो. मंत्रीमंडळांत चड तरणाटे आसतले अशें फडणवीस हांणी सांगलां. गोंयच्या मुख्यमंत्र्यांनीय मंत्रीमंडळ, मंत्र्यांच्या खात्यांनी बदल करपाक आतां कळाव करचो न्हय. आतां मेरेन मुख्यमंत्र्यांनी मंत्र्यांच्या कामकाजाचो नियाळ घेतला आसतलो. कोण क्रियाशील, कोण चौगां भितर धोंपरांचेर हात दवरून बसतात, कोणाचें वजन वाडलां हें तांकां खबर आसा. कोण भुतां नाचयतात, कोण भुतानीचे, कोणाचे दोळे दुसऱ्याच्या मतदारसंघा कडेन लागल्यात ताची जाणविकाय तांकां आसा. भाजपाची पक्षाच्या पांवड्यार वेंचणूक प्रक्रिया जातनाच मंत्रीमंडळ बदल करप गरजेचें. बरें केल्यार बरें मेळटलेंच ही मोख दवरून म्हामंडळां जाग्यार घालपी दोन अपक्षांक सरकार मंत्रीमंडळांत हाडटलें? विरोधी वांगडी, मंत्रीपदार आसतनाय आपले कुशळटायेन आमदार निलेश काब्राल पक्षा पासत वावुरल्यात. तांकां मंत्रीमंडळांत घेवन पक्षाच्या निश्ठावंतांक सांबाळचें पडटलें. तांचेर जाल्ल्या आरोपांची चौकशी पुराय जाल्या आसत जाल्यार ती म्हायती लोकांक आदीं दिवप समा जातलें.
कला आनी संस्कृती मंत्री गोविंद गावडे हांचेरय कला अकादमीचें सुदारप करतना टिका जाली. तांचें मंत्रीपद काडलें ना, कला अकादमीय बंद जाली ना. इफ्फी वेळार तीच कला अकादमी आतिथ्यांत उणी पडली ना. कला अकादमीची भोंवतण सदचे परस अंदुंचे इफ्फी वेळार मेकळी जाल्ली दिसली, निर्माते, दिग्दर्शक, कलाकारांक भावली, केटररांनी दिल्ले सेवेची तोखणाय जाली. गोविंदबाबां कडेन दुसऱ्या खात्यांची जापसालदारकी कित्याक दिवची न्हय? सभापती रमेश तवडकार हांचे कडेन आदिवासी कल्याण, सहकार, येरादारी, पंचायत खातें सांबाळपाची तांक आसा. मुख्यमंत्री डाॅ. सावंत हांची घरकान्न गोंय विधानसभेचे 2027 चे वेंचणुकेत उडी मारपाची तयारी करता. तांचें पदव्युत्तर शिक्षण जालां, राजकारणांतलें सोशल इंजिनियरींग तांकां होलमलां. राजकी जापसालदारकी घेवपाक सविता रमेश तवडकार फुडें सरतल्योच, सभापतींचें बळगें तांकां मेळटलेंच. सभापतीपदार येरादारी मंत्री माॅवीन गुदिन्हो हांकां बसोवप, रमेशबाबांचो मंत्रीमंडळांत आस्पाव करप भाजपाक 2027 चे वेंचणुकेंत फायद्याचें.
आमदार दिगंबर कामत हांणी आपूण कुशीक रावन मंत्रीपद आलेक्स सिक्वेरा हांकां दिवपाक मान्यताय दिली. आलेक्सबाब साश्टींत उपेगाक पडटले 2027 त 27 हाडपाक? तांची पिराय तांकां म्हारग पडटा. अपक्ष आमदार आलेक्स रेजिनाल्ड लाॅरेन्स साश्टीकारांक वळखीचे, उपेगाचे सगल्या धर्माच्या लोकांक एकठावपाक. उद्देगीक म्हामंडळांतल्या तांच्या वावराचो नियाळ जोखचो. नवें कितें तें आपणावपी भलायकी मंत्री विश्वजीत राणे, समाजकल्याण मंत्री सुभाष फळदेसाय हांच्या खात्यांत बदल जावचो. खात्यांक तांणी न्याय्य दिला, उंचेलें शिक्षणय तांचे लागीं आसा, दुसऱ्या खात्यांची जबाबदारी तांकां दिवची.
आमदार देविया राणे, आमदार डिलायला लोबो, आमदार जेनिफर मोंसेरात ह्यो तीन बायल आमदार. एके अस्तुरेक मंत्रीमंडळांत आस्पावन घेतल्यार 2027 त 27 खातीर नवी वाट दिसतली. मुरगांव म्हाल 2027 भाजपा वटेन हाडपा पासत पक्षनिश्ठ वावुरतात, एकाक चार पर्याय तयार जाल्यात.
घोशणा भोव जातात, पूण चालीक कितल्यो लागतात? वर्सभराचो नियाळ दिसाळीं करतलीं तेन्ना सरकारक प्रशासनांतल्या बदला पासत म्हायती मेळटली.
मंत्रीमंडळ बदलांतल्यान प्रशासन रोखडें धांवतलें अशी आस्त लोकांक आसा. नव्या वर्सांत समाजकल्याण खात्याक नवी कचेरी मेळटली, फार्मासी म्हाविद्यालया वयली ताडपत्री काडून पावसा पयलीं नवें पाखें मेळटलें, स्मार्ट सिटी बुडची ना हाची वेवस्था जातली. सोनसडो कोयर वेवस्थापन प्रकल्पाचो प्रस्न स म्हयन्यां भितर सुटावो करपाची मोख दवरची. 2027 त 27 क लागीं वचपाक तें म्हत्वाचें.
“दुबावीत जाॅब स्कॅम” कितलें व्हड आसा तें कळपाक नवें वर्स उजवाडटलें. खणीं वयल्यां मिनांत भांगर आसा पूण तें काडटना हुंवाराक आमंत्रण धाडचें न्हय. मात्शी एकनदर न्यायमुर्ती एम बी शाह आयोगाच्या अहवालाचेर मारची. सरकाराची महसुली भूंय व्हड प्रमाणांत डंपा खाला आसा. विज्ञान आनी पर्यावरण खात्याक क्लायमेट चेंज मंत्रालय हें नांव मेळटलेंच. त्या खात्याचे मान्यतायेन, येरादारीचे वेगळे वेवस्थेंतल्यान खण उद्देग मार्गाक लागतलो? नवे प्रस्न डंप्स काडपांतल्यान उप्रासचे न्हय हाची जतनाय घेवची.
नुस्त्याचेर दुकळाची सया आसतना नुस्तेमारी खात्याचो उत्सव कित्याक? तो उत्सव दोन वर्सांतल्यान एकदां जावप बरो. खात्याची पयलींची कचेरी, कर्मचाऱ्यांक बळ दिवपाक तो पयसो वापरचो.
कितल्याशाच सरकारी यंत्रणांचेर कार्यकारी अध्यक्ष आसात, अध्यक्ष ना. कार्यकारी अध्यक्षांक अध्यक्षपद दिवन यंत्रणा घटमूट जातल्यो? सरकारी येवजण्यांचो नियाळ करपाक जाय, अर्थसंकल्प 2025 निमतान तो जातलोच पूण मंत्र्यांनी केला?
अपघात उणे करप, कोयर वेवस्थापनांत शिस्त हाडप, लायट आनी उदकाच्या वापरांतल्यान येवपी येणावळ वाडोवप मंत्रीमंडळ बदलांतल्यान शक्य आसा.
स म्हयने मंत्रीमंडळाच्या वावराच्या नियाळाक खूब जाले. चवथ, दिवाळी जाली आतां नातलां आदींच निर्णय घेवन तो चालीक लावचो.
पर्यटन मंत्री रोहन खंवटे हांकां मुखेल खातें मेळपाक कोणाची हरकत आसची ना. उद्देग खातें तांकां कित्याक मेळचें न्हय? लिपिल्ल्या पर्यटन थळांचे, खात्याचे वाटेर पडिल्ले कांटे ते काडून उडयतात, मुख्यमंत्र्यांचो आधार तांकां आसा.
केंद्र सरकार नवे कायदे, नेमावळी, धोरणां करतना गोंयच्या मुख्यमंत्र्यांक मान मेळटा. मंत्रीमंडळ बदलाक कळाव नाका अशें केंद्रान सांगलां आसतलेंच.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
