भांगरभूंय | प्रतिनिधी
भांगरभूंय । प्रतिनिधी
काणकोणः भुरग्यां शिक्षणाची ब्युनाद घट्ट आसल्यार मनीस फुडें समृद्ध आनी सुसंस्कृत जावपाक शकता. ते खातीर भुरग्यांचें शिक्षक फावो ते पद्दतीन जावपारक जाय. सरकाराक तातूंत चड गुंतवणूक करपाक फोर्सार करपाक जाय अशें मत भुरग्यांच्या शास्त्रीय शिक्षण चळवळीतले अग्रणी प्रा. रमेश पानसे हांणी पैंगीणच्या श्रद्धानंद विद्यालयांत मुळावें शिक्षण कित्याक आनी कशें, ह्या विशयाचेर उलयतना मांडलें.
राजकारण्याक शिक्षण सोडून बाकीचें सगळें कळटा. ताका लागून सरकाराक भुरग्यांच्या शिक्षणाचे म्हत्व पटोवन दिवपाची गरज आसा. मुदलांत भुरग्यां शिक्षण हे मनशाच्या मेंदवाचर निंबून आसा. भुरग्यांचो मेंदू सादारण आठ वर्सां मेरेन परिपक्व जाता. देखून सव्या परस आठव्या वर्सा भुरग्यां शिक्षणाचेर भर दिला. भुरग्यांची आकलन शक्त समजून घेवन शिक्षक आनी पालकांनी कार्यरत रावपाक जाय अशें तांणी सांगलें.
बालशिक्षण परिशदेचो अध्यक्ष डॉ नारायण देसाय हांणी पानसे हांचो परिचय करून दिलो. श्रद्धानंद ज्ञान प्रसारक मंडळाचो अध्यक्ष अरूण भट हांणी सुरवेक सगल्यांक येवकार दिलो, कमलाकर म्हाळशी हांणी प्रास्तावीक केलें जाल्यार श्रद्धानंद विद्यालयाची मुख्याध्यापिका सीमा प्रभुगांवकार, सचीव सुनील पैंगीणकारान सोयऱ्यांक फुलां तुरे भेटयले.
कमलाकर म्हाळशी हांचे हस्तुकीं प्रा. पानसे हांचो भोवमान केलो. संपदा प्रभुदेसाय हिणे सूत्रसंचालन केलें. गोमंतक बाल शिक्षण परिशदेची सुरेखा दीक्षित तशेंच काणकोण तालुक्यांतल्या वेगवेगळ्या माध्यमीक आनी सरकारी प्राथमीक शाळेतले शिक्षक व्याख्यानाक व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
