भांगरभूंय | प्रतिनिधी
गोवा कॅनाची उपजिल्होधिकाऱ्या कडेन मागणी
म्हापशें: म्हापशें शारांत भीक मागप्यांचेर आळाबंद हाडचे खातीर कृती आराखडो तयार करचो. तशेंच ह्या भीक मागप्यां खातीर उत्तर गोंयांत विसवघर बांदचें, अशी मागणी गोवा कॅन संस्थेन निवेदना वरवीं उपजिल्होधिकारी गुरुदास गांवसाक दिलां.
म्हापशें बाजारांतले वेपारी आनी गिरायकांक ह्या भीक मागप्यांचो त्रास जाता. चड करून कदंब बसस्टॅण्ड, टॅक्सी स्टॅण्ड आनी बाजार वाठारांत ह्या भिकाऱ्यांचो चड वावर आसता. ह्या भिकाऱ्यां वांगडा ल्हान भुरग्यांचोय आसपाव आसता. विक्रेते आनी गिरायकां वांगडाच पर्यटकांकूय तांचो त्रास जाता, अशें निवेदनांत म्हणलां.
गोवा कॅनाचो समन्वयक रोलंड मार्टीन्सान हें निवेदन सादर केलां. सध्याचे स्थितींत उत्तर गोंयांतल्या भिकाऱ्यां खातीर राबितोघर उबारपाची खर गरज निर्माण जाल्या. तशेंच ह्या प्रकाराक आळाबंद घालचे खातीर गोंय, दमण आनी दीव भीक मागपाक मनाय अधिनेम 1972 तल्या विवीध तजविजींची अंमलबजावणी करप गरजेचें आसा, अशें निवेदनांत म्हणलां.
भीक मागप्यांक लागून उप्रासपी समस्ये कडेन संबंदीत आशिल्ले शारांतले पुलीस, येरादारी पुलीस, म्हापशें पालिका मंडळ, समाज कल्याण संचालनालय, येरादारी खातें, महिला आनी बालकल्याण विकास संचालनालय अशा विवीध यंत्रणांची संयुक्त बसका उपजिल्होधिकाऱ्यान आयोजीत करची. भिकाऱ्यांक लागून जावपी त्रासाविशीं सर्वसामान्य लोक, वेपारी, गिरायक, पर्यटक अशा विवीध समाज घटकांक थाकाय दिवप आनी भीक मागपाची सक्ती जांचेर करतात तांची राखण करप, हे खातीर ते बसकेंत कृती आराखडो तयार करपाक जातलो, हे मागणे सयत साबार सुचोवण्यो गोवा कॅन संस्थेन निवेदनांत केल्यात. हे संबंदान गोवा कॅनान नगर विकास सचीव, उत्तर गोंय जिल्होधिकारी, उत्तर गोंय येरादारी अधिक्षक, उत्तर गोंय पुलीस अधिक्षक, नगर विकास, समाजकल्याण, पर्यटन, महिला आनी बालकल्याण ह्या खात्यांचे संचालक तशेंच उत्तर गोंयचे अतिरिक्त येरादारी संचालक, म्हापशें पालिका मुख्याधिकारी आनी नागरी पुरवण तशेंच गिरायक वेव्हार खात्याचे सहाय्यक संचालक हांकांय निवेदन भेटयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.