भांगरभूंय | प्रतिनिधी
डॉ. भूषण भावे: गोंय विद्यापीठांत कविता सादरीकरण सर्त उमेदीन
पणजी: आधुनीक काळांत आमी भाशांची परंपरीक शीम मोडून बहुभाशीकताये वटेन वळपाची गरज आसा. तेन्नाच आमी भाशीक गिरेस्तकायेचें क्षितीज रूंद करपाक शकतले, अशें विद्याप्रबोधिनी शिक्षणशास्त्र महाविद्यालयाचे प्राचार्य तशेंच साहित्य अकादमीचे कोंकणी भाशेचे समन्वयक डॉ. भूषण भावे हांणी सांगले.
गोंय विद्यापीठ, कविवर्य शंकर रामाणी हांचो जल्म शती उत्सव समिती आनी मेनेझेस ब्रगांझा संस्थेच्या जोड पालवान आयोजीत केल्ले राष्ट्रीय पांवड्यावेले ‘शंकर रामाणी कविता सादरीकरण सर्तीक’ ते मुखेल सोयरे म्हणून उलयताले.
ह्या वेळार मेनेझेस ब्रागांझा संस्थेचे अध्यक्ष दशरथ परब, गोंय विद्यापीठाचे दर्या, भूंय आनी पर्यावरण विज्ञान महाविद्यालयाचे डीन डॉ. चंद्रशेखर रिवणकार, शणै गोंयबाब भाशा आनी साहित्य महाविद्यालयाचे उप डीन डॉ. प्रकाश पर्येंकार, सर्तीचे संयोजक प्रा. विनायक बापट आनी प्रा. नरेश नायक हाजीर आशिल्ले.
हे कार्यावळीक यवतमाळांत जाल्ल्या 92व्या अखिल भारतीय मराठी साहित्य परिशदेचे अध्यक्ष आनी नामनेचे साहित्यीक डॉ. अरुणा धेरे, समीक्षक डॉ. वसंत पाटणकार, शैली शास्त्राचो अभ्यासक डॉ. रमेश धोंगडे, गोंय संग्रहालयाची आदली संचालक कवी राधा भावे, कवी शंकर रामाणीचो भाचो हेमंत रामाणी आनी कवी नितीन मोरे हाजीर आशिल्ले.
प्रा. भूषण भावे हांणी फुडें आपल्या उलोवपांत म्हणलें, एकामेकांच्यो चुको दाखोवचे परस आमी आमी भास आनी साहित्य समृध्द करपाक आत्मनिरीक्षण करपाची गरज आसा.
मानाचे सोयरे दशरथ परब हांणी शंकर रामाणीच्यो कांय यादी सांगल्यो आनी अशा उपक्रमांक इन्स्टिट्यूट मेनेझेस ब्रागांझा सदांच आदार दितली अशें आश्वासन दिलें.
कार्यक्रमाचे अध्यक्ष प्रा. चंद्रशेखर रिवणकार हांणी ही सर्त आयोजीत केल्ले खातीर आयोजकांक परबीं भेटयलीं. विद्यार्थ्यां मदीं सुप्त गूणांक वाव दिवपा खातीर अश्यो सर्ती उपेगी पडटात अशें तांणी सांगलें.
सकाळच्या अधिवेशनांत डॉ. प्रकाश पर्येंकार, कोंकणी कार्यावळ संचालक डॉ. हनुमंत चोपडेंकार, संयोजक प्रा. विनायक बापत आनी प्रा. नरेश नायक हांचे हाजेरींत दिवली पेटोवन सर्तीचें उक्तावण जालें.
ही सर्त मराठी आनी कोंकणी विभागांत स्वतंत्रपणान जाली. मराठी विभागांत 15 आनी कोंकणी विभागांत 11 विद्यार्थ्यांनी कवितांचें सादरीकरण केलें. मराठी विभाग सर्तीचें परिक्षण नारायण महाले, गिरिजा मुरगोडी आनी सुनेत्रा जोग हांणी केलें. तशेंच कोंकणी विभागा खातीर रमेश घाडी, अविता गांवस आनी वैष्णवी रायकार हांणी परिक्षण केलें.
कोंकणी विभागांतलें पयलें इनाम कक्षम नायक (गोंय वैजकी महाविद्यालय), दुसरें इनाम मानसी धाउस्कार (गोंय विद्यापीठ) आनी तिसरें इनाम गौरांग गोकुळदास नायक (गोंय विद्यापीठ) हांकां फावो जालें.
मराठी विभागांत मानसी वाळवे (गोंय विद्यापीठ) हाका पयलें इनाम फावो जालें. मानसी शेट मांद्रेंकार (सेंट झेवियर कॉलेज, म्हापशें) दुसरें आनी समृद्धी येंडे (सेंट झेवियर कॉलेज, म्हापशें) हाका तिसरें इनाम मेळ्ळें.
समारोप सुवाळ्यांत मानेस्तांनी जैतवंतांक इनामां भेटयलीं. कार्यावळीचें सुत्रसंचालन प्रा. चिन्मय मधू घैसास, प्रा. कृपाली नायक आनी प्रा. गोरक शिरसाट हांणी केलें. गोंय विद्यापीठाच्या मराठी आनी कोंकणी भाशेच्या कार्यावळींतले शिक्षक आनी हेर कर्मचार्यांनीय ही कार्यावळ येसस्वी जावपाक खूब कश्ट घेतले. राष्ट्रगीतान कार्यावळ सोंपयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
