भारत-ऑस्ट्रेलिया माळ आयच्यान

भांगरभूंय | प्रतिनिधी

भारत आनी ऑस्ट्रेलिया ह्या पंगडां मदीं आयच्यान टी-20 माळेक सुरवात जाता. फुडल्या म्हयन्यांत ऑस्ट्रेलियेंत जावपी संवसारीक टी-20 क्रिकेट सर्ती पयलीं भारताच्या खेळगड्यांक सराव मेळचो म्हणून भारतीय क्रिकेट नियामक मंडळान (बीसीसीआय) ऑस्ट्रेलिया आनी दक्षीण आफ्रिका ह्या पंगडां आड टी-20 माळेचें आयोजन केलां.

संवसारीक टी-20 सर्ती खातीर वेंचिल्ले खेळगडेच हे माळेंत खेळटले. पूण, माळे पयलींच दोनूय पंगडांक कांय धपके बसल्यात. भारताचो मुख्य फास्ट बॉलर मोहम्मद शमी कोरोना पॉझिटिव्ह जाल्ल्यान ताका हे माळेंतल्यान फाटीं सरचो पडला. ऑस्ट्रेलियेचे मिचेल स्टार्क, मिचेल मार्श आनी स्टॉयनीस हे खेळगडे दुखापतीक लागून परतून घरा गेल्यात.

दोनूय देशां मदीं आतां मेरेन 23 टी-20 मॅची खेळ्ळ्यात. हातूंत भारत 13-9 असो मुखार आसा. एक मॅच बादाबाद उरल्या. ऑस्ट्रेलियेचो पंगड भारतांत सात मॅची खेळ्ळा आनी तातूंतल्यो 3 मॅची जिखला. ताका लागून ऑस्ट्रेलियेक लेगीत संवसारीक टी-20 सर्ती पयलीं हे माळेंत बरें प्रदर्शन करून आत्मविस्वास वाडोवपाची संद आसा.

मिचेल स्टार्क, मिचेल मार्श आनी मार्कस स्टोयनीस हांचे सुवातेर नॅथन एलीस, डॅनिएल सॅम्स आनी सीन एबॉट हांचो आस्पाव केला. स्कार्काक धोंपराची दुखापत जाल्या, मार्शाक पोवटीची जाल्या जाल्यार स्टॉयनीश फाटीचे दुखापतीक लागून बेजारला.

भारताच्या संवसारीक टी-20 सर्ती खातीर पंगडांत राखीव खेळगडो म्हूण घेतिल्ल्या शमीक कोरोना जाला. 10 म्हयन्यांनी भारताच्या टी-20 पंगडांत पुनरागमन करपाक सज्ज आशिल्ल्या शमीच्या मार्गांत कोरोनाचें विघ्न आयलें.

25 सप्टेंबराक ऑस्ट्रेलिये आडची माळ सोंपतली, जाल्यार 28 पसून दक्षीण आफ्रिके आडची माळ सुरू जातली. ते माळे वयलीं शमी बरो जातलो काय ना हें अजून स्पश्ट जावंक ना. ताका घरांत सात दिसां खातीर विलगीकरणांत रावचें पडटलें. दोन कोरोना चांचण्यो नॅगिटिव्ह आयल्या उपरांत तो पंगडा वांगडा सराव करपाक शकतलो. ताचे सुवातेर उमेश यादवाची निवड केल्या.

भारतीय पंगडः रोहित शर्मा (मुखेली), लोकेश राहुल, विराट कोहली, सुर्यकुमार यादव, दीपक हुड्डा, ऋषभ पंत, दिनेश कार्तिक, हार्दिक पांड्या, आर आश्विन, युजवेंद्र चहल, अक्षर पटेल, भुवनेश्वर कुमार, उमेश यादव, हर्षल पटेल, दीपक चहर, जसप्रीत बुमरा.

ऑस्ट्रेलियेचो पंगडः सीन एबॉट, अॅश्टन अॅगर, पॅट कमिन्स, टीम डॅव्हिड, नॅथन एलिस, अॅरोन फिंच, कॅमेरून ग्रीन, जोश हेझलवूड, जोश इग्लिस, ग्लॅन मॅक्सवॅल, केन रिचर्डसन, डॅनिएल सॅम्स, स्टीव्ह स्मिथ, मॅथ्यू वेड, अॅडम झम्पा.