भारतीय चित्रपटाचो संगीत अविभाज्य घटक

भांगरभूंय | प्रतिनिधी

जी. व्ही. प्रकाश कुमारः संगिताक लागून चित्रपट पळोवपाची उमळशीक वाडटा

भांगरभूंय । प्रतिनिधी

पणजीः भारतीय चित्रपटांतल्या गीत- संगिता कडेन प्रेक्षक खुबूच जुडला. संगिताक लागून चित्रपट पळोवपाची ताची उमळशीक वाडटा. ताका लागून चित्रपटांत गितां जाय, अशें संगीत दिग्दर्शक जी. व्ही. प्रकाश कुमार हांणी सांगलें.

‘बिट्स अँड रिदम’ ह्या विशयाचेर आयोजीत मास्टरक्लासींत प्रकाश कुमार उलयताले. तांचे वांगडा स्नेहा खानवलकर हाजीर आशिल्ली.

चित्रपट समिक्षक भारद्वाज रंजन हांणी तांचे कडेन संवाद सादलो. ह्या वेळार संगीत निर्मिती संबंदांत दोगांनीय आपलीं मतां मांडलीं. स्नेहा आनी प्रकाश कुमार हांणी गँग्स ऑफ वासेपूर ह्या चित्रपटा खातीर एकठांय काम केलां. चित्रपटांतले संगीत निर्मिती खातीर दिग्दर्शक अनुराग कश्यप हांणी दिल्ले मेकळीकेक लागून काम करप खूब सोंपें जालें, अशें तांणी सांगलें.

आपणें संगिताचे धडे घेवंक नात, पूण आपले कान खूब बरे आसात. ताका लागून आपणें जें संगीत आयकलें, तातूंतल्यान संगिताची जाण आपल्यांत आयली आनी ह्या मळाचेर काम करपाक मेळ्ळें, अशें स्नेहा हांणी सांगलें.

एकाद्या चित्रपटाचो रिमेक करतात, तेन्ना मूळ चित्रपटांत आशिल्लें संगीत जश्याक तशें धेतलें जाल्यार जे भाशेंत रिमेक जाता ताका पुराय न्याय मेळना. ते खातीर त्या त्या प्रादेशीक लोकसंगिताचो वापर जावपाक जाय अशें आपल्याक दिसता, अशें जी. व्ही. प्रकाश कुमार हांणी सांगलें. ह्या वेळार तांणी गँग्स ऑफ वासेपूर चित्रपटांत बिहाराचे नदरेन दिल्लें संगीत आनी एका येवपा आशिल्ल्या सिनेमांत लावणेचो केल्लो आस्पाव, अश्यो देखी दिल्यो. मजगतीं, दोगांनीय गितां सादर करून हाजीर आशिल्ल्यांची मागणी पुराय केली.

संगीत दिग्दर्शकाचेर विस्वास दवरातः स्नेहा

चित्रपटांत बरें संगीत आसचें हे खातीर कितें करचें, अशा आशयाच्या एका प्रस्नाक जाप दितना स्नेहा खानवलकर हांणी सांगलें, तुमकां चित्रपटांत कशे पद्दतीचें संगीत जाय तें दिग्दर्शकाक सांगात. तुमकां शक्य आसा जाल्यार ते प्रक्रियेंत वांटेकार जायात, ना जाल्यार संगीत दिग्दर्शकाचेर विस्वास दवरात, अशेंय तांणी सुचयलें.

सिनेमळाचेर विशिश्ट कंपन्यांची मक्तेदारी

भारतीय चित्रपट सृश्टींत संगीत मळाचेर वर्साक 1500 ते 1600 कोटींचो वेवसाय जाता. तातूंतले 750 कोटी टी सिरीज कंपनीचे आसतात. उरिल्ले कांय थारावीक कंपनींक वतात. ताका लागून नव्यान ह्या मळाचेर येवपाक सोदपी लोकांक नवे प्रयोग करून पळोवपाचो भंय दिसपा फायलें हें कारण आसता. तांकां पयशे मेळटलेच हाचो भरवसो आसना.