भारतीय गजल संमेलनाचें आयोजन

भांगरभूंय | प्रतिनिधी

आयतारा अजय नायक हांची अंकोला गजल मैफील

मडगांव: गजल सागर प्रतिश्ठान, मुंबय आनी तिष्णगत मल्टिपर्पज वेल्फेर सोसायटी आयोजीत 10 व्या अखील भारतीय गजल संमेलन पुलीस लॉन, जिल्होधिकारी कचेरे कुशीक अकोला (महाराष्ट्र) हांगा जातलें. हें संमेलन 7 आनी 8 जानेवारीक जातलें. ह्या वेळार मुशायरे, चर्चा सत्र, परिसंवाद आनी गजल गायन मैफिली रंगतल्यो. 

गोंयचे संगीतकार आनी गजल गायक अजय नायक ह्या संमेलनांत वांटेकार जातले. आयतार ता. 8 जानेवारीक दनपार उपरांतच्या सत्रांत ‘गीत गुंजन’ हे कार्यावळींत गजलींचें सादरीकरण जातलें. गोंयचे गजल रचणुककार राजय पवार आनी राधा भावे हांच्यो अजय नायक हांणी स्वरबद्ध केल्ल्यो गजल ते सादर करतले.

गोंयचे गजल चळवळीक आनी गजल गायनाक गोंयांत आनी गोंया भायर प्रतिश्ठा दिवपाचें काम ते करतात. अखील भारतीय गजल संमेलन, मुंबय आनी गोंयांत तांणी स्वता संगीतबद्ध केल्ल्यो गजल सादर केल्यात. तशेंच सुरेश भट गजल मंच, पुणें आयोजीत गजलरंग कार्यावळींत पुण्याच्या येस. येम. जोशी सभाघरांत गजल गायन सादर करून रसिकांचीं तांणी मनां जिकलीं. तांच्या संगीताच्या कार्या खातीर तांकां जायते पुरस्कारूय फावो जाल्यात. कला आनी संस्कृती खातें, गोंय सरकाराचो युवा सृजन हो पुरस्कार तांकां फावो जाला. तांणी स्वरबद्ध केल्लीं गीतां हिन्दी आनी मराठी चित्रपटांच्यो गायिका अनुराधा पौडवाल, नेहा राजपाल, जान्हवी प्रभू अरोरा तशेंच गायक स्वप्नील बांदोडकार, आदर्श शिंदे, अमोल बावडेकार हांणी गायल्यांत.

तांणी संगीत दिल्लें चित्रपट सुरींग, मोर्तु आनी मार्टीन हे भारताच्या आंतराष्ट्रीय चित्रपट महोत्सवांत गोंयांत प्रदर्शीत जाल्यात. तेचप्रमाण मोर्तू हो संगीत दिल्लो चित्रपट ऑस्ट्रेलियांत आंतराष्ट्रीय ऑस्ट्रेलियन चित्रपट महोत्सवांत प्रदर्शीत जाल्लो.

चित्रपटां वांगडा अजय नायक हांणी कितलिंशींच नाटकां, एकांकी खातीर संगीत दिलां. तशेंच अभिषेक कला मंच, मुंबय वतीन आय विटनेस ह्या वेवसायीक नाटकाचें संगीत तांणी दिलां. कला मंदीर, फोंडें हांणी गोंयच्या स्वातंत्र्याचेर आधारून महानाट्य गोंय एक जैत कथा हाचें संगीत तांणी दिलें.

तांणी संगीता वांगडा साहित्यांत मोलादीक भर घातल्या. तांणी गोंयचे संत कवी कृष्णम् भट हांचे जिणेचेर आदारून संगीत नाटक ‘विश्वाचो विश्राम रे’, तशेंच कविता झेलो ‘सुवारी’ आनी ‘मन काव्य’ ही एकांकीका पुस्तक रुपांत आयल्या.