भांगरभूंय | प्रतिनिधी
भारताच्या बायलांच्या क्रिकेट पंगडान दुसरे टी-20 मॅचींत येजमान श्रीलंकेक 5 विकेटींनी हारोवन तीन मॅचींचे माळेंत 2-0 अशी निर्णायक आघाडी घेतली.
श्रीलंकेन टॉस जिखून पयलीं बॅटींग करपाचो निर्णय घेतलो. पूण, ताका निर्धारीत 20 ओव्हरींनी 7 विकेटी वगडावन फक्त 125 धांवड्यो करप शक्य जाल्यो. भारतान 19.1 ओव्हरींनी 5 विकेटी वगडावन जैत जोडलें. स्मृती मंधानान 39 आनी मुखेली हरमनप्रीत कौरान नाबाद 31 धांवड्यांची खेळी केली.
हे खेळींत हरमनप्रीत कौरान बायलांचे टी-20 क्रिकेटींत सगल्यांत चड धांवड्यो करपी भारताची बॅट्समन थारली. तिणें आदली मुखेली मिताली राजाचो विक्रम मोडलो. हरमनप्रीतान 123 मॅचींनी 1 शेंकडो आनी 6 अर्द शेंकड्यां नेटार 2372 धांवड्यो केल्यात. मितालीन 89 मॅचींनी 2364 धांवड्यो केल्ल्यो.
ल्हान मोखीचो फाटलाव करपी भारताक स्मृती आनी शेफाली वर्मा हांणी बरी सुरवात करून दिली. दोगांयनी 3.4 ओव्हरींनी 30 धांवड्यांची भागिदारी केली. पूण, शेफालीक व्हड खेळी करपाक जमली ना. तिणें 10 बॉलांनी 17 धांवड्यो केल्यो.
सभिनेनी मेघना लेगीत 17 धांवड्यो करून बाद जाली. मंधानान 34 बॉलांक तोंड दितना आठ चवके मारले. उपरांत हरमनप्रीतान 32 बॉलांनी 31 धांवड्यो करून पंगडाक जैत मेळोवन दिलें.
ते पयलीं टॉस जिखून पयलीं बॅटींग करपी श्रीलंकेन बरी सुरवात केल्ली. विशमी गुणारत्ने आनी चमारी अटापट्टू हांणी पयले विकेटी खातीर 87 धांवड्यांची भागिदारी केली करून पंगडाक उत्कृश्ठ सुरवात करून दिल्ली. पूण, दोगूय ओपनर बाद जाल्या उपरांत श्रीलंकेचो डाव गडगडलो.
अटापट्टूक पुजा वस्त्राकरान बाद केली. ते उपरांत हरमनप्रीतान गुणारत्नेक तंबूत धाडली. ह्यो दोन विकेटी घेतल्या उपरांत भारतान मॅचीचेर आपली पकड घट्ट करपाक सुरवात केली. 17 ओव्हरींनी 2 बाद 106 धांवड्यो करपी श्रीलंकेची अवस्था 20 ओव्हरींनी 7 बाद 125 अशी केली.
गुणारत्ने (45) आनी अटापट्टू (43) हांकां सोडलीं जाल्यार श्रीलंकेच्या एकाय बॅट्समनाक दोट्टी आंकडो हुपपाक जमलो ना.
भारता वतीन दिप्ती शर्मान सगल्यांत चड 2 विकेटी घेतल्यो. जाल्यार रेणुका सिंग, राधा यादव, पुजा वस्त्राकर आनी हरमनप्रीत कौर हिणें दरेकी एक विकेटी आपल्या नांवार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
