भांगरभूंय | प्रतिनिधी
भारतीय क्रिकेट नियामक मंडळान (बीसीसीआय) राष्ट्रकूल खेळां सर्ती खातीर भारताच्या बायलांच्या पंगडाची घोशणा केली. हरमनप्रीत कौर पंगडाचें फुडारपण करतली. जाल्यार स्मृती मंधाना उप मुखेली आसतली.
भारत आपली पयली मॅच 29 जुलयाक संवसारीक वस्ताद ऑस्ट्रेलिये आड खेळटलो.
बीसीसीआयन 15 वांगड्यांच्या पंगडाची घोशणा केली. राष्ट्रकूल खेळा खातीर वेंचिल्ल्या पंगडांत व्हड अजापभरीत निर्णय घेवंक ना. श्रीलंके आड हालींच वन डे आनी टी-20 माळेंत खेळपी खेळगड्यांकूच संद दिल्या. आक्रमक युवा विकेटकीपर बॅट्समन ऋचा घोष हिका 15 वांगड्यांच्या पंगडांत सुवात मेळूंक ना. हो एकूच निर्णय धपको बसपी आसा. तिचे सुवातेर तानिया भाटियाक घेतलां. टी-20 कारकिर्दींत तिणें फक्त 9चे सरासरीन धांवड्यो केल्यात. विकेटकीपराची जापसालदारकी लेगीत तीच सांबाळपाक शकता.
टी-20 प्रकारांत भारता खेरीत संवसारीक वस्ताद ऑस्ट्रेलिया, येजमान इंग्लंड, न्युझिलॅण्ड, दक्षीण आफ्रिका आनी पाकिस्तान हांचे सयत कांय व्हड पंग वांटो घेतले.
भारताक ऑस्ट्रेलिया, पाकिस्तान आनी बारबाडोस ह्या पंगडां वांगडा अ गटांत दवरला.
पंगडः हरमनप्रीत कौर (मुखेली), स्मृती मंधाना (उप मुखेली), जेमिमा रॉड्रिग्स, शेफाली वर्मा, एस मेघना, तानिया भाटिया (विकेटकीपर), यास्तिका भाटिया (विकेटकीपर), दिप्ती शर्मा, पुजा वस्त्राकर, राजेश्वरी गायकवाड, मेघना सिंग, रेणुका सिंग, राधा यादव, हरलीन देओल आनी स्नेह राणा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
