भांगरभूंय | प्रतिनिधी
संवसारीक टी-20 क्रिकेट सर्तीच्या सरावाच्या मॅचींक सुरवात जाली. भारतान सध्याचो वस्ताद ऑस्ट्रेलियेक 6 धांवड्यांनी हारयलो.
पयलीं बॅटींग करतना भारतान निर्धारीत ओव्हरींनी 7 विकेटी वगडावन 186 धांवड्यो केल्यो. लोकेश राहुलान 33 बॉलांनी 57 धांवड्यो आनी सुर्यकुमार यादवान 33 बॉलांनी 50 धांवड्यांचें योगदान दिलें.
ते उपरांत धांवड्यांचो फाटलाव करपी ऑस्ट्रेलियेक 180 धांवड्यांचेर आडायलो. निमाण्या पांच ओव्हरींनी जैता खातीर 43 धांवड्यांची गरज आशिल्ली आनी ताच्यो आठ विकेटी हातांत आशिल्ल्यो. 16वे ओव्हरींत भुवनेश्वर कुमारान फक्त चार धांवड्यो दिल्यो आनी एक विकेट लेगीत घेतली. 17वे ओव्हरींत आश्विनान 10 धांवड्यो दिल्यो. 18वे ओव्हरींत अर्शदीप बॉलिंगेक आयलो आनी ताणें 13 धांवड्यो दिल्यो. 19वी ओव्हर हर्षल पटेलान घाली. ताणें फक्त पांच धांवड्यो दिल्यो आनी दोन विकेटी लेगीत पडल्यो.
हर्षलान पयलीं फिंचाक बोल्ड केलो. उपरांत विराट कोहलीच्या थेट थ्रोचेर टीम डॅव्हिड धांवबाद जालो. पूण, ह्या जैतांत भारताचो फास्ट बॉलर मोहम्मद शमी पर्जळ्ळो. ताणें निमाणे ओव्हरींत ऑस्ट्रेलियेचो डाव गडगडावन उडयलो. ऑस्ट्रेलियेक निमाणे ओव्हरींत जैता खातीर 11 धांवड्यांची गरज आशिल्ली. शमीन पयल्या बॉलाचेर दोन धांवड्यो दिल्यो. दुसऱ्या बॉलाचेर दोन धांवड्यो दिल्यो. पूण, फुडल्या चार बॉलांचेर चार विकेटी घेवन मॅच भारता वटेन घुंवडायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
