भांगरभूंय | प्रतिनिधी
भारताचो दादल्यांचो आनी बायलांचो हॉकी पंगड आयज बेल्जियमाच्या पंगडां आड एफआयएच प्रो लीग अभियानाची परतून सुरवात करपाक मैदानांत देंवतले. हे वरवीं राष्ट्रकूल खेळां सर्ती पयलीं लय मेळोवपाचो भारताच्या पंगडांचो यत्न आसतलो.
भारताचो दादल्यांचो पंगड बेल्जियमा आड 11 आनी 12 जूनाक खेळटलो. ते उपरांत नॅदरलॅण्डा आड 18 आनी 19 जूनाक रॉटरडॅमांत खेळटलो. जाल्यार बायलांचो पंगड 11 आनी 12 जूनाक बेल्जियमा आड खेळ्ळ्या उपरांत अर्जेंटिना आड 18 आनी 19 जूनाक खेळटलो आनी ते उपरांत अमेरिका पंगडा आड 21 आनी 22 जून आड खेळटलो.
भारताच्या बायलांच्या पंगडा खातीर ह्यो मॅची 1 ते 17 जुलय मेरेन स्पेन आनी नॅदरलॅण्ड ह्या देशांनी जावपी बायलांचे संवसारीक हॉकी सर्तीचे दिश्टीन चड म्हत्वाच्यो आसात.
प्रो लिगेंत भारताचो दादल्यांचो पंगड अातां मेरेन 12 मॅचींतल्यान 27 गुणां सयत दुसरे सुवातेर आसा. तो बेल्जियम परस एके सुवातेन वयर आसा. दोनूय पंगडांचे समान गूण आसात. पूण, गोल फरकाच्या नेटार भारत दुसरे सुवातेर आसा.
भारताक आयच्यान सुरू जावपी मॅचींनी जैत जोडून पयले सुवातेर पावपाची संद आसा. नॅदरलॅण्डाचे 10 मॅचींतल्यान 28 गूण घेवन पयले सुवातेर आसा.
भारताचे दोनूय पंगड प्रो लिगेंत बरें प्रदर्शन करून 28 जुलय ते 8 ऑगस्ट मेरेन बर्मिघमांत जावपी राष्ट्रकूल खेळां सर्ती पयलीं लय मेळोवपाचो यत्न करतले.
युरोपाचे भोंवडेर दादल्यांच्या पंगडाचें फुडारपण अमीत रोहिदास करतलो. डिफॅन्सांत अणभवी गोलकीपर पी आर श्रीजेश आनी युवा सुरज करकेरा वांगडा डिफॅण्डर सुरेंद्र कुमार, हरमनप्रीत सिंग, वरुण कुमार, अमीत रोहिदास, जुगराज सिंग आनी जसमनप्रीत सिंग हांचो आस्पाव आसा.
मिडफिल्डांत टोकियो ऑलिम्पिकांत कांश्या पदक जिखपी पंगडाचे वांगडी मुखेली मनप्रीत सिंग, हार्दिक सिंग, शमशेर सिंग, विवेक सागर प्रसाद, आकाशदीप सिंग आनी नीलकंठ शर्मा आसा. जाल्यार फॉरवर्डांत गुरजंत सिंग, मनदीप सिंग, शिलानंद लाकडा, सुखजीत सिंग, ललित कुमार उपाध्याय आनी अभिषेक हे खेळटले.
बायलांच्या पंगडाचें फुडारपण गोलकीपर सविता करतली. जाल्यार डिफॅण्डर दीप ग्रेस एक्काक उप मुखेली केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
