भांगरभूंय | प्रतिनिधी
वन डे माळ पयलींच आपल्या नांवार करपी भारत आयज तिसरे आनी निमाणे मॅचींत येजमान वॅस्ट इंडिजाक हारोवन क्लीन स्वीप करपाचो यत्न करतलो.
आयतारा दुसरी मॅच जिखून वॅस्ट इंडिजा आड सेगीत 12वी माळ जिखपाचो संवसारीक विक्रम केल्लो. खंयच्याय एका प्रतिस्पर्धी पंगडां आड सेगीत चड माळो जिखपी सर्वोत्कृश्ठ प्रदर्शन आसा. भारतान पाकिस्तानाचो विक्रम मोडलो. पाकिस्तानान झिम्बाब्वे आड सेगीत 11 माळो जिखिल्ल्यो.
मुख्य प्रशिक्षक राहुल द्रविड नव्या खेळगड्यांक संद दिवपाक शकता. पूण, तो जैताचो क्रम कायम राखपाचो यत्न करतलो. शुभमन गिला बदला ऋतुराज गायकवाडाक संद मेळप कठीण दिसता. गिलान फाटल्या दोन मॅचींनी 64 आनी 43 धांवड्यांची खेळी केल्या. गायकवाडाक दक्षीण आफ्रिके आड पुर्ण माळ खेळपाची संद मेळिल्ली. पूण, तो फास्ट बॉलरां आड संघर्श करतना दिसलो.
श्रेयस अय्यर आनी संजू सॅमसन हाणें फाटले मॅचींत अर्द शेंकड्यांची खेळी केल्ली. पूण, सुर्यकुमार यादवाक पयल्या दोन मॅचींनी अपेस आयिल्लें. तरी आसतना ताका आयज संद मेळपाक शकता. पंगड वेवस्थापनान सुर्यकुमाराक खेळोवपाचो निर्णय घेतलो जाल्यार ईशान किशनाक परतून एकदा भायर बसचे पडुये.
रवींद्र जडेजाक हे माळे खातीर उप मुखेली केल्लो आनी अश्टतासाच्या रुपान पंगड वेवस्थापनाची पयली पसंद आशिल्ली. पूण, धोंपराचे दुखापतीक लागून ताका पयल्यो दोन मॅची चुकल्यात आनी तिसरे मॅची खातीर तो उपलब्ध आसा काय ना हें लेगीत स्पश्ट ना. दोनूय मॅचींनी ताची गैरहाजेरी जाणावंक नाशिल्ली. खास करून दुसरे मॅचींत अक्षर पटेलान नाबाद 64 धांवड्यांची खेळी करून भारताक जैत मेळोवन दिल्लें.
अक्षर पटेलाची हे खेळी आड पंगड वेवस्थापन आडनदर करपाक शकना. अर्शदीप सिंग इंग्लंडाचे भोंवडेर जखमी जाल्लो. पूण, आतां तो तंदुरुस्त आसा. ताका आवेश खानाचे सुवातेर खेळोवपाक शकता. आवेशान दुसरे मॅचींत स ओव्हरींनी 54 धांवड्यो दिल्ल्यो आनी एकूय विकेट लेगीत घेवंक नाशिल्ली.
आवेश आनी प्रसिद्ध कृष्णा हांची बॉलींग शैली एकसारकी आसा. ताका लागून कोणा एकल्याक निमाण्या इकरांत खेळोवपाक शकतात.
दुसरे वटेन वॅस्ट इंडिजा कडेन प्रतिभावंत खेळगडे आसात. पूण, तांकां अपेक्षे प्रमाण सर्वोत्कृश्ठ प्रदर्शन करपाक जमूंक ना. पंगड अजून शाई होप, निकोलस पुरन, रोवमॅन पावेल हांचेरूच निंबून आसा.
म्हत्वाच्या खिणाक बरें प्रदर्शन करपाक पंगडाक जमूंक ना. आयचे मॅची खातीर जेसन होल्डराक निमाण्या इकरांत सुवात मेळुये. विंडिजाची मुख्य मोख हारीचो क्रम मोडप आसा. बांगलादेसा आडची माळ ताणें 0-3 फरकान वगडायिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
