भांगरभूंय | प्रतिनिधी
बायलांचे संवसारीक टी-20 क्रिकेट सर्तींत भारताक आपले पयले मॅचींत न्युझिलॅण्डा कडल्यान 58 धांवड्यांनी हार घेवची पडली. हांगाच्या दुबय आंतरराष्ट्रीय क्रिकेट स्टेडीयमाचेर जाल्ले मॅचींत न्युझिलॅण्डान टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 4 विकेटी व्हगडावन 160 धांवड्यो केल्यो. मोखीचो फाटलाव करपी भारताक 19 ओव्हरींनी सगल्यो विकेटी व्हगडावन फकत 102 धांवड्यो करप शक्य जाल्यो.
भारताची सुरवात बरी जाली ना. स्मृती मानधना आनी शेफाली वर्मा डावाची सुरवात करपाक मैदानांत देंवली. पूण, मॅचीचे दुसरेच ओव्हरींत भारताक पयलो धपको बसलो. इडेन कार्सनान आपलेच बॉलिंगेचेर शेफाली वर्माक (2) कॅच बाद केली. ते उपरांत मानधना लेगीत 12 धांवड्यो करून कार्सनाचे बॉलिंगेचेर मॅडी ग्रीनाक कॅच दिवन परतली.
ते उपरांत मुखेली हरमनप्रीत कौर आनी जेमिमाह रॉड्रिग्स हांणी डाव सांबाळपाचो यत्न केलो. पूण, बरे सुरवातीचो फायदो घेवपाक तांकां जमलो ना. हरमनप्रीत 14 बॉलांनी 15 धांवड्यो करून रोझमेरी मेअराचे बॉलिंगेचेर एलबीडब्ल्यू बाद जाली. फाटोफाट ली ताहुहून जेमिमाह हिका 13 धांवड्यांचेर बाद केली. मदल्या ओव्हरींनी ताहुहून बरी बॉलींग घाली. तिणें ऋचा घोषाक लेगीत चड वगत खेळपट्टीचेर तग धरपाक दिलो ना. ते उपरांत तिणें दिप्ती शर्माक बाद केली. दिप्ती बाद जाल्या उपरांत भारताची जैताची आस्त सोंपिल्ल्यांत जमा जाली. तरी सकयले सुवातेर बॅटींग करपी बॅटरांनी भारताक मोखीच्या लागसार व्हरपाचो यत्न केलो. पूण, तांकां अपेस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
