भांगरभूंय | प्रतिनिधी
दोन खेपेचो वस्ताद भारतान काल जाल्ले उमळशीक वाडोवपी पॅनल्टी शुटआवटांत बळिश्ट ऑस्ट्रेलिया पंगडाक 5-4 अशा गोल फरकांनी हारोवन सुल्तान जोहोर करंड हॉकी सर्त जिखली. ह्या जैतान भारतान फाटल्या पांच वर्सां पसून चालू आशिल्लो किताबाचो दुकळ सोंपयलो.
दोनूय पंगड निर्धारीत वेळाच्या खेळांत 1-1 अशे बरोबरींत आशिल्ले. ताका लागून निकाल लावपाक शुटआवटाचो आदार घेवचो पडलो. हातूंत लेगीत दोनूय पंगड 3-3 अशे बरोबरींत उरले. ताका लागून मॅच सडन डॅथांत पावली.
उत्तम सिंगान शुटआवटांत दोन गोल केले. हातूंत सडन डॅथांत केल्ल्या गोलाचोय आस्पाव आसा. ताचे खेरीत विष्णुकांत सिंग, अंकित पाल, सुदीप चिरमाको हांणी लेगीत गोल केले. ऑस्ट्रेलिये वतीन बर्न्स कुपर, फोस्टर ब्रोडी, ब्रुक्स जोशुआ आनी हार्ट लियाम हांणी गोल केले.
ते पयलीं निर्धारीत वेळाच्या खेळांत भारतान पयल्या क्वॉर्टरांत गोल केलो. चिरमाको सुदीप हांणी सुंदर फिल्ड गोल केलो. ऑस्ट्रेलियेन दुसऱ्या क्वॉर्टरांत प्रत्युत्तर दिलें. होलंडान बरोबरीचो गोल केलो.
फुडल्या 30 मिनटांच्या खेळांत दोनूय पंगडांनी आनीक गोल करपाचो खर यत्न केलो. पूण, मॅच 1-1 अशी बरोबरींत सोंपली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
