भांगरभूंय | प्रतिनिधी
पणजी, प्रतिनिधी ः भलायकी खात्यांत दोतोरां खातीर १९ पदां जाहीर जाल्यांत. तीं भरपा खातीर २६ ते ३० आॅगस्ट मेरेन सकाळीं १० वरांचेर सरळ मुलाखती जातल्यो, अशी अधीसुचोवणी भलायकी सेवा संचालनालयान काडल्या.
ह्या १९ पदां मदलीं ६ वैजकी अधिकार्यां खातीर आसात. म्हयन्याचो पगार रु. ६५,००० इतलो आसा. ह्या पदां खातीरची मुलाखत ३० आॅगस्टांक सकाळच्या १० वरांचेर जातली. इंडियन मॅडीकल कॉवन्सील एक्ट १९५६च्या पयल्या वा दुसर्या अनुसुचित वा तिसर्या अनुसुचीच्या भाग १ (परवानो दिवपाचे पात्रताये खेरीत) हातूंत आस्पाविल्ली मान्यताप्राप्त वैजकी प्रात्रताय, तिसर्या अनुसुचीच्या भाग २ हातूंत आस्पावीत शिक्षणीक पात्रताय धारकांनी आयएमसी कायदो १९५६ चे कलम १९ (३) वा गोंय वैजकी स्कुलाची पदवी हातूंत नमूद केल्ल्यो अटी पुराय करप गरजेचें. रोटेटींग इंटर्नशीप पुराय करप सक्तीचें आसा. तशेंच कोंकणी आनी मराठीचें गिन्यान आसपाक जाय.
अनेस्थितीस्ट दरेकी ३ पदां, गायनोकाॅलेजीस्ट, सर्जन, इएनटी सर्जन दरेकी २ पदां आनी पिडीअट्रीशन, फिजीशीयन, रेडीयोलोजिस्ट, ओर्थोपेडीक सर्जन हे खातीर दरेकी दोन पदां जाहीर जाल्यांत. ह्या सगळ्या पदां खातीर म्हयन्याचें वेतन रु. ९५,००० इतलें आसतलें. हाची पात्रताय वैजकी अधिकार्यांक लागू जाता तशीच आसा. पूण, ते भायर ह्या पदां खातीर संबंदीत विशेशताय हातूंत पदव्युत्तर पात्रताय पद्वी, संबंदीत विशेशताय हातूंत १ वर्साचो अणभव सक्तीचो आसा. मराठी आनी कोंकणीचें गिन्यान अपेक्षीत आसा.
पिडीअट्रीशन, गायनोकाॅलेजीस्ट आनी अनेस्थिटीस्ट हे खातीरची मुलाखत २६ ऑगस्ट, फिजीशीयन, गायनोकोलेजीस्ट खातीर २७ ऑगस्ट, सर्जना खातीर २८ ऑगस्ट, ईएनटी सर्जन आनी ओर्थोपेडीक सर्जना खातीर मुलाखत २९ ऑगस्टाक सकाळीं १० वरांचेर काम्पाल पणजे भलायकी संचालनालयात संचालकाचे चॅम्बरांत जातली, अशी म्हायती संचालक (प्रशासन) श्रीपाद आर्लेकार हांणी अधिसुचवणेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
