भांगरभूंय | प्रतिनिधी
म्हापशें, प्रतिनिधी ः वझरांत – वागातोरा पुलिसांच्या गुन्यांव फांट्यान काल ड्रग्स तस्करीच्या प्रकरणांत ब्रिटीश नागरिक जॉन विल्यम पार्किन्सन (52) हाका अटक केली. ताचे कडल्यान सुमार 15 लाखांचें एलएसडी पेपर आनी लिक्वीड ड्रग्स जप्त केल्यांत.
वागातोरांतल्या फुटबॉल मैदानाच्या फाटले गेटीचेर आशिल्ल्या लिव्हज क्लबा लागसार ड्रग्स तस्करी जावपाचे आशिल्ल्याची म्हायती गुन्यांव फांट्याचे पुलीस निरिक्षक नारायण चिमुलकार आनी तांच्या पंगडाक मेळ्ळी. ते प्रमाण काल सांजवेळा 6.15 सावन पंगडान तांकां धरपाची तयारी सुरु केली. रातच्या सुमार 8.45 वरांचेर दुबावीत एमएच- 04- एचडब्ल्यू- 8546 हे स्कुटरी वयल्यान थंय पावलो. त्याच वेळार पंगडान ताका ताब्यांत घेतलो आनी ताची तपासणी केली. तेन्ना गुन्यांव फांट्यान ताचे कडल्यान 15 लाखांचें ड्रग्ज जप्त केलें. हाचे भायर स्कुटर आनी दोन मोबायल फोनय जप्त केल्यात. मजगतीं, सगळी चवकशी आनी पंचनामो केले उपरांत ताचेर गुन्यांव नोंद करुन ताका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
