भांगरभूंय | प्रतिनिधी
कलियुग जावं कितें! खरें आनी बरें ताका मर्ण ना. भांगर उज्यात घाल्यार लेगीत चड लकलकता.
हे त्या बोडकाक अशेंच चिड्डील्यार पुरो.
उडटा पळय कशे? सुंगटशे.
नेहाक झपझप करून पावलां मारून वतना पळोवन दोगांचें पित्त खवळिल्लें.
चार पयशे जाल्यात आसतले म्हूण इतलें उडटा.
तोंडान मात सामके! सुबेज… फटकळ.
चार दीस रे… आपुणच जाग्यार येतलें. बामणाक बामणाची नसाय. आपलोच जातीभाव वयर चडटा ते पळोवन तांच्या पोटांत जाता. फकत दुस्वास
बामण वयर सरूंक फावना. आसुं रे न्हय ती उतरां उलोवन बेठीच दुस्मानकाय नाका. सोडून दी तें सगळें. आतां जग खूब फुडें पावला. पुरो पुरो ह्यो कोल्या काणयो म्हाक सांगु नाका.
बरें बाबा चुकलो हांव.
हें पळय आयलें सुंगट
सुंगट म्हण ना जाल्यार… कितेंय म्हण, असल्या निरर्थक गजालीक हांव मेजीना. नेहान सांगलें. तुमकां खंयचीच लेव्हल ना म्हूण तुमी अशे. learn to grow, and glow.
दोन उतरां इंग्लीश उलयलें म्हणटकच कितें मळबाक हात तेंकलो? चार पुस्तकां वाचात. तुमी सुदारतले. पळयलें, खरें उलयल्यार खंय जेंवचे वता. पूण तूं बोडुक…. हें मात खरें म्हळ्यार! तुका समजुवचें ना तें आतां.
संवाद थंयच सोंपोवन नेहा परत सडसडीत चलत रावलें.
नेहा शिकिल्लें. चार चौगांत भोंविल्ले. सुशिक्षीत, सी.ए. वाचन करपी. खणखणीत खंयच्याय प्रस्नाची जाप दिवपी. I choose to make the rest of my life the best of my life ह्या ध्येयान मुखार पांवला मारपी. अशें लेंचेपेंचे न्हय.
शांतनुच्या आॅफिसांत ताचो दबदबो, निर्भींडताय, दादल्यांक दचक हाडटाली. ही खंयची गार्गी काय मैत्रेची कोणाक खबर. साम, दाम, दंड भेदाचे खेळ खेळत चाणक्य नीत आपणावपी… करता तरी कितें ते आॅफिसांत? तकलेंत घोळिल्ल्या प्रस्नाक जाप नासताली. चार चौगांत विशय जावन बशिल्लें.
जीन पॅन्टस, शाॅर्ट, ताजेर बानयेन. घालून सहजतायेन भोंवपी. आॅफिसांत मात ताची फाॅर्मल कपड्याची घडी तशीच टाप टीप.
पुराय आॅफिस सांबाळटां. डायरेक्टर जालें. पयसोय भरपूर हातांत खेळत रावलो. आॅफिसांत येतल्या वतल्याची वळख. फुडें वेपार, वेव्हार आयच्या राजकारणांत तुमचे सारकी एक तरी धीट बायलमनीस जायच. सगळेच सर… आनी सर! मॅडम भोवच कमी न्हय?
हय, गो आमकांय तशेंच दिसता. पूण ते आर.एस. एस. तांकां? बायलो नाका म्हणता न्हय? तर्क नाका रे. वाऱ्यावेल्यो खबरी नाका वेंचणुकेत उबे रावल्यार तुका कोण आडायतलो. तशें जाल्यार खेळ मांडुया. पत्ते न्हय. सत्ते पे सत्ता न्हय, म्हाभारतांतल्या शकुनी मामाचो दुत फाशे मारपाचो खेळ. बुद्धीबळ परवडलो पूण… शकुनीचे? फाशे म्हळ्यार गळ्याक फांस. ते फाशे कोण तरी म्हारू देवचाराच्या हाडांचे? खरें आसत?
तें सोड, आमी कितें करया?
टॅस्ट मॅची गेल्यो रे. ट्वेन्टी ट्वेन्टी…. आय.पी.एल. सोमार,…. श्रावणी सोमार नेहाच्या लागीचो, श्रद्धेचो, रुद्राभिषेक देवळांत घरची सगळी मंडळी. मोठ्या उमेदीन सगळी जमिल्ली.
नेहा कित्याक गो रूद्राभिषेक?
करचो दिसलो म्हूण केलो गे.
बेठेच. कितेंय पूण आसतलें. एक दोग जाणां बडबडलीं. तिंय बी आपसांतूच. नेहान लक्ष दिलें ना. स वरांचेर रांगेत उबे लोकांक कांबळी वाटल्यो. देव तुजें बरें करूं बाये. आशिर्वाद घेवन नेहाक बरें दिसलें.
आपल्या बापायचेच आशिर्वाद हे… सगली ताचीच पुण्याय. दान धर्माचो सपाटो सो ! कसलें नाटक चल्लां? तुमीच करची नाटकां! बायलांनी कितेंय केल्यार नाटक आी तुमचे कितें हाॅलीव्हूड! तुका बोडकाक जापूच दिवंक फावना.
मागीर दिवं नाका
बरें बाय, म्हूण नेहा तडक चलत रावलें.
उजो रे बाबा !
हाजे कडेन लग्न जातलो त्रासांत पडटलो.
तशें कांय नासता रे. तें चड बरो संवसार करतलें.
आनी नेहाचे अकस्मात लग्न थारलें. लग्न एका गिरेस्ता बरोबर. पयशेकार गाडी, घोडे म्हणटात तशें दांत भायर काडून पाडेपणान उलोवपी, तोमणें मारपी तोणांत बोटां घालून पळयत उरलें.
ओर्राद भोंवता तें पळोवन कांय जाणांच्यो भुंवयो वयर जातल्यो. कांय जाण तोंडां वांकडीं करताले. पूण नेहा मात खरेंच बोडुक. तितलेंच नेटान तशेंच धिटायेन पावलां मारतालें. वेंचणुक लागी पावली. आतां फुडें कितें? नेहाचे नॅट व्हरकींक साॅलीड. इश्ट, इश्टीणी वळखी, हितचिंतकांनी ताचेर पावस घालो. नेहा तुम आगे बढो, हम तुम्हारे साथ है! म्हणटात म्हणटा नेहा पयली वेंचणूक जिंकलें. जैतीवंत जालें, जापसालदारकी वाडली. विरोधकांनी केल्ली कारस्थानां, भायर काडली. खंयची पार्टी आनी अपक्ष. हे मांडिल्लो खेळ पयसो खावपाक, लुटपाक मनांतली तळमळ लोकांच्या काळजां मेरेन आपूणच पावता.
तुमकां लागून हांव जैतीवंत जालां. एकार एक वेंचणुकांनी जैतीवंत जावन नेहा केंद्रीय मंत्र्यांच्या सुवातांनी स्थिर जालें.
पाडेपणाच्या इत्सा बाळगुवपी तशेच तोडां आं करून उरले. सगळ्या बायलवावुरप्याक मुखार काडीत रावलें. त्या बोडकान लोकांच्या काळजांत घर केल्लें. खऱ्या मनां पसून लोकांची सेवा करता देखून तुकाच आमी वेंचून दितलीं. नेहाचें दोळे भरून आयलें. कलियुग जावं कितें! खरें आनी बरें ताका मर्ण ना. भांगर उज्यात घाल्यार लेगीत चड लकलकता.
– विजया शेळडेकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.