भांगरभूंय | प्रतिनिधी
48 वरां भितर कारवाय करून एफआयआर नोंदोवपाचो आदेश
भांगरभूंय । प्रतिनिधी
पणजी: बेकायदो रेंव काडप्यांचेर कारवाय करपा खातीर सरकारान मामलेदारांच्या फुडारपणा खाला म्हालवार घोळट्या पंगडांची स्थापणूक केल्या. तशेंच 48 वरां भितर कारवाय करून एफआयआर नोंदोवपाचो आदेश घोळट्या पंगडाक दिला.
मामलेदारांच्या फुडारपणा खाला घोळट्या पंगडांत संबंदीत पुलीस स्टेशनाचे निरिक्षक, सहाय्यक पुलीस निरिक्षकपदा वयले पुलीस अधिकारी, दोन कॉन्स्टेबल, खण खात्याचे अधिकारी, भौशीक बांदकाम खात्याचे सहाय्यक अभियंते वा प्रधान मुखेल अभियंत्यांनी निश्चीत केल्ले अधिकारी, सहाय्यक मोटार वाहन निरिक्षक तशेंच सेटलमेंट आनी भूंय अभिलेख संचालनालयाचे अधिकारी बी हांचो आस्पाव आसतलो.
बेकायदो रेंव काडपा वयल्यान कांय दिसां पयलीं कुडचडें वाठारांत फारपेटीची घडणूक घडिल्ली. हातूंत एका कामगाराक मरण आयिल्लें. ह्या प्रकरणा उपरांत गोंयचे कायदो आनी सुवेवस्थे वयल्यान विरोधी पक्षांनी सरकाराचेर खर हल्लो सुरू केला. ते खातीर मुख्यमंत्री डॉ. प्रमोद सावंत हांणी हो विशय गांभीर्यान घेतला.
उच्च न्यायालयाच्या आदेशा प्रमाण गोंयांत रेंव काडप फाटल्या कांय वर्सां सावन बंद आसा. ताचो व्हड फटको थळाव्या लोकांक, बांदकाम वेवसायिकांक तशेंच सरकाराकूय बसत आसा. रेंवेंतल्यान सरकाराचे तिजोरेंत येवपी महसूल पुरायपणान आडावला. ते खातीर मुख्यमंत्र्यान मुखेल सचिवां सयत विवीध खात्याच्या अधिकाऱ्यां बरोबर घेतिल्ले बसकेंत घेतिल्लो. ते प्रमाण आतां दीस-रात गस्त वाडोवन बेकायदो रेंव काडटात तें आडावपा खातीर सरकारान म्हालवार घोळटो पंगड नेमपाचो निर्णय घेतला.
‘एनआयओ’ कडल्यान सरकाराक अहवाल सादर
शापोरा न्हंय सोडून हेर चार न्हंयांतलीं रेंव काडपा विशीं दर्या विज्ञान संस्थेन (एनआयओ) सरकाराक अभ्यास अहवाल धाडिल्ल्याची म्हायती संस्थेचे संचालक सुनीलकुमार सिंग हांणी ‘भांगरभूंय’ कडेन उलयतना दिली. ह्या अहवालाचेर रोखडोच विचार करून चार न्हंयांतल्यान परंपरीक रेंव काडपाक परवानो दिवपाचे निर्देश मुख्यमंत्री डॉ. प्रमोद सावंत हांणी खण खात्याक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
