भांगरभूंय | प्रतिनिधी
सरफेसी कायद्या खाला कारवायः कॅनरा बँके कडेन ताबो
भांगरभूंय । प्रतिनिधी
म्हापशें: कॅनरा बँकेची कोट्यांनी रुपयांचें रीण फारीक करूंक नाशिल्ल्या प्रकरणांत बांदकाम वेवसायीक व्यंकटेश प्रभू मोनी हाचो साल्वादोर दी मुंद वाठारांतलो दोन माळ्यांचो आवांताद बंगलो बार्देसचे मामलेदार दशरथ गांवस हांणी सील केलो.
सरफेसी कायद्या खाला प्रभू मोनी हांणी तो बंगलो रितो करपाची नोटीस मामलेदारान जारी केल्ली. नोटीस मेळिल्ल्या खिणां सावन 48 वरां भितर हो बंगलो रितो करून बंगल्याचो ताबो संबंदीत बँके कडेन दिवपाचो निर्देश हे नोटिशेंत दिल्लो, पूण प्रभू मोनी हाणें निर्देशाक पाळो दिवंक ना. निर्धारीत वेळांत बंगलो रितो करून बँके कडेन दिवंक नाशिल्ल्यान पुलीस संरक्षणांत साल्वादोर दी मुंद वाठारांतलो बंगलो सील केलो आनी ताचो ताबो कँनरा बँके कडेन दिलो. मेळिल्ले म्हायती प्रमाण, प्रभू मोनी हाणें कॅनरा बँकेचें सुमार 8 कोटी रुपयांचें रीण फारीक करूंक नाशिल्लें. हालींच कॅनरा बँकेन प्रभू मोनी हाचीं कार्यालयां आनी गाडयो सील केल्ल्यो. हे कारवायेंत प्रभू मोनीन मुंबयच्या रीण वसुली लवादा कडेन याचिका दाखल केल्ली, पूण तांची याचिका भायर मारिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
