भांगरभूंय | प्रतिनिधी
कोणाचेर कसलोच अन्याय जावचो न्हय हाची ते जतनाय घेताले. पुण अन्याय जाला अशें दिसलें जाल्यार मात ते पेटुन उठ्ठाले आनी न्याय मेळ मेरेन झुजत रावताले
काळचक्र घुंवत आसता. पोरणें वचून नवें येवप हो सैमाचो नेमूच. झाडा वयली पोरणीं पानां गळुन पडटात आनी तीं नव्यांक सुवात दितात. संवसारांत कितलेशेच मनीस जन्मताल, मरतात. पुण सगळेच आमच्या मनाच्या कुर्कुटांत उरूंक शकनात. पूण जे समाजा खातीर आपली जीण ओंपतात ते मात आमचे यादींत सासणाचे उरतात. अशीच एक व्यक्ती आमचे यादींत उरल्या आनी ती म्हळ्यार आमचे पितृदेवो भव’ स. बाळकृष्ण दामोदर नायक भाटकार. तांच्या यादींची पोटली हांव वाचकांमुखार उगडूंक सोदतां.
बाळकृष्ण नायक भाटकार हें एक वेगळेंच व्यक्तीमत्व. केन्ना कोणय संकश्टांत सांपडल्यार ते धांवत वताले. अडचल्ल्यांक आदार, निर्शेंल्ल्यांक सल्लो आनी गळसणल्ल्यांक मार्गदर्शन दिवपाक ते सदांच मुखार आसताले आनी म्हणुनच तांचें मार्गदर्शन घेवपाक तांच्या सालांत सदांच लोकांची वा बरें मागप्यांची गर्दी आसताली. पूण आयज तें साल किण्ण पडलां. मार्गदर्शन दिवपी ते ‘बाबा’ नात आनी तांचे सल्ले मन लावन आयकुपी मनीसूय नात. तांची वृत्ती सरळ आनी सडेतोड आसली. अन्याया आड झगडपाची तांकां खुमखुमी आसताली. कोणाचेर कसलोच अन्याय जावचो न्हय हाची ते जतनाय घेताले. पुण अन्याय जाला अशें दिसलें जाल्यार मात ते पेटुन उठ्ठाले आनी न्याय मेळ मेरेन झुजत रावताले. सगल्यांक प्रेमान वागोवप आनी इश्टागतीचें नातें वाडोवप हातूंतच तांकां समाधान भोगतालें.
रेयशमागुस- वेऱ्यां नायक भाटकार आडनावांचे एकमेव धराणें. नांवांन भाट आसुनुय तांचे कडेन भाट नासले आनी भाटकारशाय नासली. ‘मनशान गर्वान केन्नाच रावचे न्हय. सादें रावचें आनी सदांच ल्हानपण घेवचें. जो ल्हानविकायेन रावता ताकाच व्हडपण मेळटा अशें बाबा आमकां सांगताले आनी लहानपणान वागताले, ‘आपूण व्हड, आपूण सांगतां तें तुवे आयकुंक जाय अशें ते केन्नाच म्हणिनासले. ल्हान भुरग्यांची मतां वा विचार लेगीत एकेक फावटी खरे आनी विचारवंतांक लज हाडपी आसतात अशें तांचें म्हणणें आसलें. बाळकृष्ण नायक भाटकार हे आस्पतीन भाटकार नासले तरी मनाचे भाटकार आसले. तांणी मराठी नाट्यकलेचेर खूब प्रेम केले. मुंबयंतली बरीं- बरीं नाटकां ठेकेदार पद्धतीन तांणी गोंयांत हाडलीं. गोंयांतले पयले नाटक ठेकेदार म्हणून बाळकृष्ण नायक भाटकार हांचेंच नांव घेतात. तांच्या चार – चौपटीच्या घरांत नाटक कंपनीचो राबितो आसतालो. आनंद संगीत मंडळी, भारत नाट्यकला, श्री समर्थ पुणे आनी हेर जायत्या नाटक कंपनींचो राबितो त्याच घरांत आसतालो. आनी देखून नाट्य कलाकारांक लागीं सावन पळोवपाची संद आमचे सारक्यांक मेळटाली. ते नाटक कंपनीच्या लोकां कडेन इतले आपुलकीन वागताले की ते आपलेच एक घटक अशें नाटक कंपनीच्या जाळवणदारांक दिसतालें, इतले ते तांच्यांत समरस जाताले.
बाळकृष्ण नायक भाटकार एक धडपडी व्यक्तिमत्व आसले. तांणी साबार उद्येगधंदे केले. पयलीं गोंय- मुंबय- गोंय बस सेवा सुरू केली. भाटकार ट्रॅव्हल्स कंपनीच्यो बशी मुंबय वचूंक लागल्यो. निश्ठेन तांणी ही बस सेवा चलयली. चलयतना केन्नाच कोणा कडेन तडजोड केलीना वा कोणा कडेन किजीलय केलेंना, पुण काय कारणाक लागून ती बस सेवा चड तेंप तिगली ना. तांकां मनीस जाय आसले. ते मनशांचेर प्रेम करताले आनी इश्टागत वाडयताले. ती जोडपाक वेळ लागला. तुटपाक मात कळाव लागना, अशें ताचें म्हणणें आसलें आनी मनीस जोडपाचो वावर ते करताले. भुरग्यांक बरी शिकवण मेळची असो तांचो आग्रो आसतालो. भुरग्यांचेर ते खुब प्रेम करताले आनी ह्या प्रेमाक लागुनच तांणी आपल्या घरांतली सुवात सदळ हातान हायस्कुला खातीर दिली. ह्या हायस्कुलांत शिक्षण घेतिल्ले भुरगे उंचेल्या पदार पावल्यात.
घरांत नाटक कंपनी रावताली. ताका लागून बरे- बरे नाट्यकलाकार पळोवपाचे भाग्य त्या वाड्याक लाबलां. ह्या वाड्यान जयराम शिलेदार, जयमाला शिलेदार, नानासाहेब शिरगोपीकर, नलिनी बोरकर, बाबुराव गोखले, बाळ धुरी हांचे सारके कितलेशेच नामनेचे नट तर पळयलेच, पूण तेच वांगडा शरद पवार, कल्याणराव पाटील, बाळासाहेब देसाय हे सारके राजकारणीय पळयले. तांकां इश्टागतीचें नातें घट करपाची संवय आसली – तांचो दयानंद बांदोडकार हांचे कडेन संबंध आसलो. तांणी तो वाडयलो आनी घट केलो. रेयसमागुस- वेऱ्यां एक सिनेमा थेटर जावचें, अशें तांचें सपन आसलें. तांणी तशी तयारीय चलयिल्ली. भाऊसाहेब बांदोडकार हांचे कडेन आपलो प्रस्तावूय मांडिल्लो. तांकांय तो आवडलो आनी हे विशीं फुडलीं उलोवणी करपा खातीर भाऊन तांकां आपोवणें धाडिल्लें. पूण त्याच दिसा भाऊसायबांक मरण आयलें आनी तें सपन मातये भरवण जालें.
तांणी कलेचेर खुब प्रेम केलें. नाटक म्हण्ल्यार एक जीण. नाटकांत भूमिका करप जशी कठीण तशीच जिणेंत विंगड विंगड संवंगा करपय कठीण अशें ते म्हणटाले. तांणी देवमाणूस आनी ताची करामत ह्या नाटकांनी केल्ली भुमिका सगळ्यांच्या काळजांत घर करून आसा. श्री शांतादुर्गा निलीकान्नीचो कालो म्हणलो की ते सदांच फुडें आसताले. विदुशक- संकासुराची भूमिका ते आवडीन आनी तन्मयतेन करताले. आपलें शरीर आतां थकलां अशें म्हणून ते केन्नाच फाटीं रावले नात. पिरायेन जरी जाण्टले जाले, तरी मनान ते तरणाटेच आसले. विदुशक संकासुर सादर करतना तांच्या आंगांतली ती चपळाय आनी उमेद पळोवन तरणाट्यांची मान सकयल बागवताली.
तांकां भ्रश्टाचारा विशीं तिडक आसली. राजकारणी जे खेळ खेळटात ते विशीं राग आसलो आनी हो तांचो राग, तांची तिडक तांच्या उलोवण्यांतल्यान दिसताली. समाजांत जें वायट चल्लां ते विशीं ते खंती जाताले आनी समाज भ्रष्टाचारमुक्त जावचो म्हणून कोणें तरी मुखार सरूंक जाय अशें म्हणटाले. तांकां समाजकार्याची तळमळ आसली. समाजसेवा म्हळ्यार देवसेवा अशें ते म्हणटाले.
गजानन बा. नायक भाटकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
