भांगरभूंय | प्रतिनिधी
77.51 टक्के मतदान; कळंगूटे प्रभाग णवचें मतदान आयज
म्हापशें: बार्देस म्हालांतल्या 33 पंचायतींनी 77.51 टक्के मतदान जालें आनी 995 उमेदवारांचो फुडार सीलबंद जाला. ह्या म्हालांत मतदान सुरळीत आनी शांततायेन जालें. कळंगूट पंचायत प्रभाग णवची मतदान प्रक्रिया मात स्थगीत दवरून ती आयज (बिरेस्तारा) घेतले. दोगां उमेदवारांच्या मतपत्रिकां वयल्या चिन्नाची चुकीची छपाय जाली. हे घडणुकेक लागून वेंचणूक आयोगाक बुधवाराची वेंचणूक रद्द करची पडली.
ह्या म्हालांत 1.55 लाख मतदार आसात. पूण 1 लाख 20 हजार 407 मतदारांनीच मतदानाचो हक्क बजायलाे. हातूंत 62254 बायलां आनी 59153 दादल्या मतदारांचो आस्पाव आसा.
सकाळच्या सत्रांत म्हालांतल्या विवीध पंचायत वाठारांतले मतदार व्हड संख्येन भायर सरले आनी तांणी मतदानाचो हक्क बजायलो. सकाळ सावन सांजवेळ मेरेन मतदान केंद्राचेर व्हड रांको दिसल्यो नात. ताका लागून सकाळ सावन सांजवेळ मेरेन मतदानाची सरासरी समान दिसून आयली.
सकाळीं 10 मेरेन 19 टक्के मतदान जालें, दनपारां 12 मेरेन 40.97 टक्के, दोन वरां मेरेन 56.52 टक्के जाल्यार सांजवेळा 4 मेरेन 72.05 टक्के मतदान जाल्लें. ह्या वेळार तरणाट्यां मतदारां परस ज्येश्ठ मतदारां मदीं चड उमेद दिसून आयली.
कांय मतदान केंद्राचेर एका परस चड बूथ आशिल्ल्यान मतदारां मदीं गोंदळाचे वातावरण निर्माण जालें. कांय सुवातींनी उमेदवारांच्या कार्यकर्त्यांनी केंद्रा भायर गर्दी करतकूच पुलीस तशेंच घोळट्या पंगडा कडल्यान ह्या लोकांक धांवडायले.
बार्देस म्हालांतल्या पंचायत वाठारांतले सवूय आमदार पंचायतींचेर आपले समर्थक उमेदवार वेंचून येवचे हे खातीर यत्न करताले. हे खातीर वेगळ्यावेगळ्या प्रकारान अशा उमेदवारांक तेंको आनी सहकार्य ह्या आमदारांनी दिल्लें.
कळंगूटचे आमदार मायकल लोबो आनी शिवोलेची आमदार डिलायला लोबो हांणी लेगीत आपले समर्थक पॅनल कळंगूट आनी शिवोली मतदारसंघांत जैतिवंत जातलें असो दावो तांणी केला.
पंचायत राज कायद्यांत दुरुस्ती करून पंचायतीचे अधिकार उणे करपाचो यत्न सरकारान चलयला. वेंचून येवपी नव्या पंच वांगड्यांनी मुखार येवन ह्या प्रकाराक विरोध करचो अशें आवाहन मायकल लोबोन केलें. जाल्यार सरकारान पंच वांगड्यांक चडांत चड अधिकार दिवचे अशीय मागणी लोबोन केली.
म्हजे मतदार म्हाका व्हड मतांनी जैतिवंत करतले असो म्हाका विस्वास आसा. वेंचून येतकूच गांवचे उदरगतीचेर भर दितलों. तरणाट्यांच्या रोजगारा विशीं मुखेलपणान आवाज काडटलों अशें पर्रा पंचायतीचे उमेदवार आनी आमदार लोबो जोडप्याचो पूत डॅनियल लोबोन स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
