भांगरभूंय | प्रतिनिधी
भांगरभूंय । प्रतिनिधी
मुरगांवः सत्ताधारी भाजपान सरकारांतल्या आमदारांक विवीध मंत्रालयां वांगडाच म्हामंडळां वांटल्यांत. मात हातूंतल्या बार्देस म्हालांतल्या एका आमदारान राज्य सरकारा कडेन मुरगांव म्हालांतल्या वास्कोच्या मुरगांव नियोजन विकास प्राधिकरणाची मागणी लावन धरल्या. ताका लागून वास्को, दाबोळी, कुठ्ठाळीच्या लोकप्रतिनिधींच्या कार्यकर्त्यांचेर अन्याय जातलो, अशी म्हायती मुरगांव म्हालांतल्या एका ज्येश्ठ भाजपा पदाधिकाऱ्यान दिल्या.
गोंयांत भाजपाचें सरकार स्थापन जाले उपरांत सत्ताधारी पक्षांतल्या कांय आमदारांक मंत्रिपद जाल्यार हेर आमदारांक म्हामंडळां दिल्यांत. तशेंच तेंको दिल्ल्या अपक्ष आमदारांक लेगीत म्हामंडळां दिल्यांत. पूण अजून लेगीत सत्ताधारी लोकप्रतिनिधींच्या कार्यकर्त्यांक उरिल्लीं म्हामंडळां दिवंक नाशिल्ल्यान कांय भाजपा कार्यकर्ते बेजार जाल्यात.
मुरगांव म्हालांत भाजपाचे दोन आमदार वेंचून आयल्यात जाल्यार एका अपक्ष आमदारान भाजपा सरकाराक तेंको दिला. मुरगांव म्हालांत वेंचून आयिल्ल्या भाजपा आमदाराच्या कार्यकर्त्यांनी फाटल्या कांय दिसां दिसा सावन मुरगांव नियोजन विकास प्राधिकरणाचे अध्यक्षपद मेळचें म्हूण आपल्या आमदारा कडेन मागणी केल्या. वास्कोच्या मुरगांव नियोजन विकास प्राधिकरणाची रिती आशिल्लें अध्यक्षपद बार्देस म्हालांतल्या दुसरे खेपे वेंचून आयिल्ल्या भाजपा आमदारान केल्या. त्या आमदारान सरकाराचे चेपण हाडून अध्यक्षपदा खातीर नेटाच्यो हालचाली सुरू केल्यात. त्या बार्देसांतल्या आमदारान सरकारांतल्या एका वरिश्ठ फुडाऱ्या कडेन मुरगांव नियोजन विकास प्राधिकरणाची मागणी केल्या, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
