भांगरभूंय | प्रतिनिधी
एनसीआरबी अहवालः 68 गुन्यांवांतले दुबावीत पिडेस्तांचे वळखीचे
पणजी : गोंयांत 2021 वर्सां बायलां वयल्या अत्याचारांचें 224 गुन्यांव नोंद जाल्यात. हातूंत 72 बलात्कारांच्या गुन्यांवांचो आस्पाव आसा. हातूंतल्या 94.4 टक्के म्हणल्यार 68 गुन्यांवांतले दुबावीत पिडेस्तांचे वळखीचे आशिल्ल्याची धपको दिवपी म्हायती मुखार आयल्या. ते भायर 2021त न्यायालयान फक्त चार गुन्यांवांतल्या दुबावितांची सबळ पुरावे नाशिल्ल्यान निर्दोश सुटका केल्या. जाल्यार राज्यांत विवीध न्यायालयांनी बायलां वयल्या अत्याचाराचीं 1,755 प्रकरणां प्रलंबीत आशिल्ल्याची म्हायती राष्ट्रीय गुन्यांव रेकॉर्ड ब्युरोन (एनसीआरबी) सादर केल्ल्या 2021च्या गुन्यांवांच्या अहवालांतल्यान स्पश्ट जाल्या.
राष्ट्रीय गुन्यांव नोंदणी विभागाच्या आंकडेवारी प्रमाण, राज्यांत भारतीय दंड संहितेच्या कलमा खाला 2021त 258 बायलां वयल्या अत्याचाराचें 224 गुन्यांव नोंद जाल्यात. हातूंत 74 पिडेस्तांचेर 72 बलात्काराचे गुन्यांव नोंद जाल्यात. तशेंच हातूंतले 68 गुन्यांवांतले दुबावीत पिडेस्तांच्या वळखीचे आशिल्ल्याची म्हायती मुखार आयल्या. ते भायर फक्त चार जाण अनवळखी व्यक्तींचो आस्पाव आसा.
ते भायर 81 बायलांचो विनयभंग केल्ल्यान 74 गुन्यांव, एके बायलेचेर घोवान वा सोयऱ्यान छळ केल्ले प्रकरणांत 1 गुन्यांव, 40 बायलांच्या अपहरण प्रकरणांत 39 गुन्यांव, 37 बायलांच्या मानवी तस्करी केल्ल्यान 14 गुन्यांव, 20 बायलांचो अपमान केल्ले प्रकरणातं 20 गुन्यांव, एका सान पिरायेचे चलयेक शिंदळकी वेवसाय करपाक भाग पाडिल्ल्याचो एक गुन्यांव दाखल जाला. जाल्यार 4 बायलांचेर सायबर गुन्यांवां खाला अत्याचार केल्ल्याचे तीन गुन्यांव नोंद जाल्यात.
एनसीअारबीच्या अहवाला प्रमाण, पुलिसां कडेन फाटल्या वर्सा बायलां अत्याचाराच्या 101 गुन्यांवांचो तपास प्रलंबीत आशिल्लो. ते उपरांत 2021त 258 बायलां अत्याचाराचे 224 गुन्यांव नोंद जाल्यात. हे सगले मेळून पुलिसांनी 325 प्रकरणां 2021त हाताळ्ळ्यात. हातूंतल्या 52 गुन्यांवांत पुलिसांनी न्यायालयांत अंतीम अहवाल दाखल करून निकालांत काडल्यात. तशेंच एक प्रकरण अदखलपात्र आशिल्ल्यान, एक प्रकरण फटींग आशिल्ल्यान निकालांत काडल्यात. तशेंच 22 प्रकरणांनी तथ्य नाशिल्ल्यान निकालांत काडल्यात. जाल्यार 178 गुन्यांवांत पुलिसांनी न्यायालयांत दुबाविता आड आरोपपत्र दाखल केल्यात. पुलिसां कडे 95 प्रकरणांत प्रलंबीत आसात.
तशेंच, एनसीआरबीच्या अहवाला प्रमाण, न्यायालयांत फाटल्या वर्सा बायलां वयल्या अत्याचाराचे 1,664 खटले प्रलंबीत आशिल्ले. ते उपरांत 2021त पुलिसांनी 178 गुन्यांवांत आरोपपत्र दाखल केले. ताका लागून 2021त न्यायालयांत 1,842 खटल्यांची सुनावणी जाल्या. तातूंतल्या 11 खटले दुबावितांचेर आरोप निश्चीत जावपा पयलीं न्यायालयान निकालांत काडले. दोन गुन्यांव रद्द केले जाल्यार 8 गुन्यांवांतल्या दुबावितांचे खटले सुरू आसतना मरण आयिल्ल्यान ते निकालांत काडले. ते भायर 76 खटल्यांतल्या दुबावितांचेर आरोप निश्चीत करून सुनावणी पुराय जाल्या. 63 खटल्यांतल्या आरोपींची सबळ पुरावे नाशिल्ल्यान निर्दोश सुटका केल्या. फक्त चार खटल्यांतल्या आरोपींक ख्यास्त केल्या. ते भायर 9 खटल्यांतल्या दुबावितांचेर आरोप निश्चीत जावंक ना. ते खातीर न्यायालयान तांची सुटका केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
