भांगरभूंय | प्रतिनिधी
भांगरभूंय । प्रतिनिधी
पोरणे गोंयः बांयगिणी हांका कोयर प्रक्रिया प्रकल्प सुरू करपा खातीर सरकारान सुवात वेंचून काडल्या तरी थंय आपूण आमदार आसमेरेन कसोच व्हो प्रकल्प जावपाक दिवचो ना अशें कुमारजुवेंचो आमदार राजेश फळदेसाय हांणे सांगलां. ह्या कोयर प्रकल्पाक आपणे विधानसभेंत विरोध केलाच आता लोकां वांगडा ताका विरोध करपाक आपूण फुडें आसतलों अशें ताणे सांगलां.
कुमारजुवेंच्या आदल्या आमदारान ह्या कोयर प्रकल्पा विशयाचेर फरत न्हीद काडली असो आरोप पांडुरंग मडकयकार हांचे नांव घेनास्तना केला. व्हो कोयर प्रकल्प जाल्यार ताचे आशी-कुशीक रावपी लोकांक ताचो सामको त्रास जातलो. ह्या लोकां वांगडा वचून आपणे प्रकल्पाचे सुवातेची पळोवणी केली तेन्ना हो प्रकल्प लोकांक बऱ्याक पडचो ना हें आपल्याक पटलां आनी ते खातीर आपलो ताका विरोध आसा अशें फळदेसाय हांणी पत्रकारांक सांगलें. फाटल्या 19 जूनाक फळदेसाय हाच्या फुडारपणा खाला थळाव्या लोकांनी प्रकल्पा आड एक व्हडलो मोर्चा काडल्लो.
प्रकल्पाचे सुवाते सरभोंवतणी सुमार दोन हजार फ्लॅटांनी 6 तें 7 हजार लोका रावतात. त्या भायर प्रकल्पा पसून लागींच पोरण्या गोंयांतल्या दायज वाठारांत चर्ची तशेंच मठ, शाळा, हॉस्पिटल आनी करमळी तळी आसा. कोरय प्रकल्पांतल्या येवपी घाण सगळ्या वाठारांत पातळटली. लोक वस्ती नाशिल्ल्या वाठारांत सरकारान व्हो प्रकल्प व्हरपाक जाय अशें फळदेसाय हांणी सांगलें.
पयलींच्या आमदारान, पोरणे गोंय पंचायत मंडळान प्रकल्प जावचो न्हय म्हणून कितें केलें हाचें म्हाका कांय पडून गेल्लें ना. तांचे कांय हितसंबंद आसुए हे खातीर तांणी प्रकल्पाचो विशय ताणून धरलो नासपाक शकता. मात आपल्याक हो प्रकल्प बायंगिणी येल्लो नाका. लोकां वांगडा रावून आपूण ताका विरोध करतलों अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
