भांगरभूंय | प्रतिनिधी
फायलीं आडखळ्ळ्याे, मंत्री निरशेले
भांगरभूंय I प्रतिनिधी
पणजी : भौशीक बांदकाम खातें (पीडब्ल्यूडी) सध्याचे स्थितींत 50 टक्केच अभियंत्यांक घेवन काम करता. खात्याचे सचीवपद मुख्य सचीव पुनीतकुमार गोयल हांचे कडेन आसा. तांचेर कामाचो ताण आशिल्ल्यान ‘पीडब्ल्यूडी’च्याे फायलीं आडखळून उरल्यात. हे विशीं मुख्यमंत्री डॉ. प्रमोद सावंत हांचे कडेन सचीव बदलपा विशीं आपूण चर्चा करतलो, अशी म्हायती मंत्री नीलेश काब्राल हांणी सोमारा पत्रकारां कडेन उलयतना दिली.
पिडब्ल्यूडींत विवीध अभियंते तशेंच हेर कर्मचाऱ्यांचीं पदां जायत्या वर्सां पसून रितीं आसात. विधानसभा वेंचणुके पयलीं भरती प्रक्रिया सुरू केल्ली, पूण कांय कारणांक लागून ती रद्द केली. उण्या मनीसबळाक लागून लोकांचीं कामां खात्या कडल्यान वेळार जावप कठीण जाला, अशें मंत्री काब्राल हांणी म्हणलें. खात्यांत अभियंते आनी हेर कर्मचाऱ्यांची भरती सुरू करपाची मागणी आपूण मुख्यमंत्र्यां कडेन करतलो, अशें तांणी म्हणलें.
खात्याच्यो फायलीं मंजुरी खातीर आपूण वेळांत सचीव पुनीतकुमार गोयल हांचे कडेन धाडटा. पूण गोयल हेच राज्याचे मुख्य सचीव आशिल्ल्यान तांचे कडेन हेर कामांय आसात. ते खातीर आपूण धाडिल्ल्यो फायलीं आडखळून उरतात. पिडब्ल्यूडी सचीवपदाची जापसालदारकी दुसऱ्या सचिवा कडेन दिवपाची मागणी आपूण मुख्यमंत्र्या कडेन करतलो, अशें काब्राल हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
