भांगरभूंय | प्रतिनिधी
पणजी : होंडाचो बसस्टँड वापराविणें आसा जाल्यार वाळपय बस स्टँडाचो उणो वापर जाता. तरी लेगीत होंडा आनी वाळपय बस स्टँडांची दुरुस्ती तशेंच नुतनीकरणा खातीर 1 कोटीची तजवीज आसा.
आमदार देविया राणे हांच्या प्रस्नाक येरादारी मंत्री मॉवीन गुदिन्हो हांणी ही लेखी जाप दिल्या.
दोनूय बसस्टँडाचेर दुरुस्ती खातीर बरेच पयशे खर्च जाल्या.
होंडा बसस्टँड वापराविणें आसा. प्रवासी नासले तरी कांय बशी बसस्टँडाचेर वचून येतात.
6 जून 2022 दिसा आमदार देविया राणे हांणी होंडा बसस्टँडाच्या पांख्याचें पत्रे बदलचे, अशें पत्र कदंबा म्हामंडळाक बरयिल्ले. तशेंच 2023 वर्सा होंडा बसस्टँडार सभाघर बांदपाचो विचार करचो, अशें पत्र भौशीक बांदकाम खात्याक बरयिल्ले.
सत्तरी म्हालांत दोन बसस्टँडां आसात. होंडा आनी वाळपय बसस्टँडांच्या नुतनीकरणा खातीर 1 कोटीची तजवीज अर्थसंकल्पांत आसा.
2021 – 22 वर्सा 7 लाख 25 हजार रुपया वाळपय बसस्टँडाच्या दुरुस्तीचेर खर्च जाले. 2022 – 23 वर्सा होंडा बसस्टँडाच्या दुरुस्तीचेर 1,250 रुपया खर्च जाले. ह्याच वर्सा वाळपय बसस्टँडाचेर 86,321 रुपया खर्च जाले. 2023 – 24 वर्सा होंडा बस स्टँडाच्या दुरूस्तीचेर 7,455 रुपया खर्च जाले. ह्याच वर्सा वाळपय बसस्टँडाचेर 3 लाख 57 हजार रुपया खर्च जाले. लेखी जापेत देखभालीच्या खर्चाची म्हायती दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
