भांगरभूंय | प्रतिनिधी
आराखडो रद्द जालो ना, जाल्यार मुख्यमंत्र्यान राजिनामो दिवचो
भांगरभूंय I प्रतिनिधी
पणजी : आमदारांच्या बसके पयलीच मुख्यमंत्री डॉ. प्रमोद सावंत हांणी म्हादय विशींची सरकाराची भुमिका स्पश्ट केल्ल्याचो निशेध करीत विरोधी पक्षाच्या आमदारांनी मुख्यमंत्र्यांनी आपयिल्या बसकेचेर बहिश्कार घातलो. हाका लागून म्हादयच्या बसकेक भाजप, मगो आनी अपक्ष मेळून 33 आमदार हाजीर आशिल्ले. ते भायर केंद्रीय मंत्री श्रीपाद नायक हाजीर आसले. विरोधी पक्षाचो एकूय आमदार बसकेक हाजीर नाशिल्लो.
कळसा – भांडुरा प्रकल्पाच्या आराखड्याक केंद्रान मान्यताय दिल्ल्यान राज्यांत खवदळ निर्माण जाला. म्हादयचें उदक वाटावपा खातीर सरकार, राजकी पक्ष तशेंच कार्यकर्ते सक्रीय जाल्यात. हे फाटभुंयेर सोमारा सांजे मुख्यमंत्री डॉ. प्रमोद सावंत हांणी सगल्या आमदारांची बसका आपयिल्ली. हे बसके पयलीं विरोधी पक्षांच्या आमदारांची बसका जाली. काँग्रेसीचे युरी आलेमांव, अाल्टोन डिकोस्टा, अॅड. कार्लोस फेरेरा, गोवा फॉरवर्डाचे विजय सरदेसाय, आपाचे व्हेंझी व्हिएगस, क्रूज सिल्वा, आरजीचे विरेश बोरकार बसकेक हाजीर आशिल्ले. सर्वपक्षी आमदारांचे बसकेंत रणनिती थारावपा खातीर विरोधी पक्ष फुडारी युरी आलेमांव हांणी ही बसका आपयिल्ली.
बसके पयलीच निर्णय जाहीर केल्ल्यान घेतली हरकत
मुख्यमंत्री डॉ. प्रमोद सावंत हांणी सोमारा सकाळीं मंत्रीमंडळाची बसका घेतली. कळसा – भांडुरा प्रकल्प आराखड्याची मान्यताय रद्द करपा खातीर प्रधानमंत्री नरेंद्र मोदी हांचे सयत केंद्रीय मंत्री गजेंद्रसिंह शेखावत हांची भेट घेतले. सर्वपक्षी शिश्टमंडळ दिल्लींत व्हरपाचे मुख्यमंत्री डॉ. प्रमोद सावंत हांणी जाहीर केले. हाका विरोधी पक्षाच्या आमदारांनी हरकत घेतली. बसके पयलीच सरकाराचो अजेंडा निश्चीत आसा. सर्वपक्षी शिश्टमंडळ दिल्लींत व्हरपाचे मुख्यमंत्र्यांनी पयलीच जाहीर केलां. आतां आमदारांची बसका घेवपाचो हेत कितें? बसकेंत वांटो घेवपाक आतां कसलोच अर्थ ना, अशें विरोधी पक्ष फुडारी युरी आलेमांव हांणी सांगलें.
7 दिसांत मुख्यमंत्र्यांनी राजिनामो दिवचो
कळसा – भांडुरा प्रकल्प आराखडो रद्द करपाची मागणी मुख्यमंत्री डॉ. प्रमोद सावंत प्रधानमंत्र्यां कडेन करपाचे आसात. केंद्रीय जलशक्ती मंत्री गजेंद्रसिंह शेखावत हांची लेगीत मुख्यमंत्री भेट घेतले. मागणी केले उपरांत 7 दिसांत आराखड्याची मान्यताय रद्द जाली ना, जाल्यार मुख्यमंत्री डॉ. प्रमोद सावंत हांणी राजिनामो दिवचो, अशी मागणी युरी आलेमांव हांणी केली. राज्यांत आनी कर्नाटकांत भाजप सरकार आसा. ते भायर केंद्रांत लेगीत भाजप सरकार आसा. केंद्र तशेंच कर्नाटकाचेर चेपण हाडपा खातीर मुख्यमंत्र्यांनी राजिनाम्याची तयारी दवरपाक जाय, अशें तांणी म्हणलें.
केंद्रान आराखड्याक मान्यताय दिल्ल्याची
म्हायती मुख्यमंत्र्यांक दिल्या : विजय सरदेसाय
गोंयांत आनी कर्नाटकांत भाजपाचें सरकार आसा. केंद्रांत भाजपाचें सरकार आसा. कळसा – भांडुरा प्रकल्पाचो आराखडो करपाच्याे कर्नाटकाच्यो हालचाली बरोच तेंप सुरू आसात. हाचेर कर्नाटकाच्या मंत्र्यांची केंद्रीय जलशक्ती मंत्र्यां कडेन लेगीत बसका जाल्या. हे फाटभुंयेर गोंयचे मुख्यमंत्री डॉ. प्रमोद सावंत हांकां आराखड्याच्या मान्यतायेची पयलीं कल्पना दिवंक ना, हाचेर कोणाचोच विस्वास बसचो ना, अशें विजय सरदेसाय हांणी सांगलें. केंद्रांत आनी कर्नाटकांत भाजपाचें सरकार आसा. आराखडो रद्द करपाची मागणी सरकाराक करप शक्य आसा. हाका लागून सर्वपक्षी शिश्टमंडळाची गरज कितें? असो प्रस्न तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
