भांगरभूंय | प्रतिनिधी
पणजी: गोंयांतलें पर्यटन आनीक घटमूट करपा खातीर बंद पडिल्ले खूबशे पर्यटन उपक्रम परतून सुरू करतले. आतां नवो पर्यटन हंगाम सुरू जावपाचो आसून ताचे पयली हे सगले उपक्रम सुरू करतले अशें पर्यटन मंत्री रोहन खंवटे हांणी सांगलें.
गोंयांत पर्यटनाक वाव दिवपा खातीर गोंय सरकारा कडल्यान विवीध उपक्रम राबयतात. कांय उपक्रम कोरोनाक लागून बंद पडिल्ले. हाचे पयलीं हॉट बलून सेवा, हीप होप पर्यटकां खातीर बस सेवा, हॅलिकॉप्टर सेवा, उदकांत तशेंच जमनीर चलपी बस सेवा अशे खूबशे उपक्रम आसात. हातूंतले कांय उपक्रम बंद आसात. हे सगले उपक्रम आतां रोखडेच सुरू जातले. ज्या कंत्राटदारांनी हे उपक्रम सुरू करपा खातीर कंत्राट घेतिल्लें तांणी ते परतून घेतले नात जाल्यार दुसऱ्या कंत्राटदाराक दितले अशें खंवटे हांणी सांगलें.
गोंयांत आतां व्हड प्रमाणांत पर्यटक येत आशिल्ल्यान पर्यटन उपक्रम राबयतात. पर्यटकांक बऱ्यो तशेंच सुरक्षीत सेवा उपलब्ध करून दिवपा खातीर पर्यटन खातें फुडाकार घेत आसा. पर्यटन सुवातेर कांय बेकायदो गजाली घडटात ताचेर पर्यटन खात्याचें लक्ष आसून अशा बेकायदो गजालींचेर कारवाय करतले अशेंय मंत्री रोहन खंवटे हांणी सांगलें.
पर्यटन खात्यान सुरू केल्ल्या जेटी धोरणाक कांय लोक गररजे भायर विरोध करतात. पयलीं तांणी हें जेटी धोरण समजून घेवचें. आमी ह्या धोरणा प्रमाण आनीक नव्यो जेटी बांदचे नात. ज्यो जेटी आसात तांचो फक्त पर्यटना खातीर वापर करतले. लोकांच्यो कसल्योय सुचोवण्यो आसत जाल्यार त्यो आमी आस्पावन घेवंक शकतात. पूण कांय जाण विरोध करून लोकांक भडकावपाचें काम करतात अशें पर्यटन मंत्री रोहन खंवटे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
