भांगरभूंय | प्रतिनिधी
भांगरभूंय । प्रतिनिधी
पणजी :राज्यांत रेंव काडपाक बंदी आसून लेगीत फोंडें आनी दिवचल तालुक्यांनी अवैध मार्गान रेंव काडप चालू आसा, अशी म्हायती मुंबय उच्च न्यायालयाच्या गोंय खंडपीठाक सोमाराक दिली. हाचेर आळाबंदा हाडपा खातीर खंडपीठान वेळोवेळ निर्देश जारी केल्यात त्या भायर पुलिसांनी मार्गदर्शक तत्वां जारी केल्यांत. तरीय रेंव काडपाचें काम चलता. बेकायदेशीरपणान रेंव काडपाक आळाबंद हाडपाक अपेशी थारिल्ल्या संबंदीत पुलीस अधिकाऱ्यां आड कसली कारवाय करतले हाची म्हायती प्रतिज्ञापत्रा वरवी दिवपाक खंडपिठान पुलीस म्हासंचालकाक सांगलां.
रेंव काडपाक न्यायालयान बंदी घातिल्ली आसतनाय रेंव काडटात हाका लागून गोवा रिव्हर सँड प्रोटेक्टर्स नेटवर्क संघटनेन न्यायालयीन अवमानाची याचिका दाखल केल्या. ‘रेन्बो वॉरियर्स’ या संघटनेने 2018 वर्सा रेंव काडपाच्या प्रकारा संबंदी मूळ याचिका सादर केल्ली. 18 डिसेंबर 2019 दिसा ती निकालांत काडटना न्यायालयान राज्य सरकार, खण, येरादारी, पुलीस आनी बंदर कप्तान तशेंच हेर संबंदीत खात्यांक बेकायदेशीरपणान रेंव काडपी वेवसायिकांचेर कारवाय करपाचो आदेश दिल्लो. अशें आसून लेगीत रेंव काडपाचें काम चल्लां हे खातीरगोवा रिव्हर सँड प्रोटेक्टर्स नेटवर्कान ही याचिका सादर करून रेंव काडपाचो प्रश्न परत एक फावट उपस्थीत केल्लो.
ज्या सुवातांनी रेंव काडपाचें काम चलतालें थंय 24 वरा पुलीस गस्त दवोरपाचो आदेश पुलीस म्हासंचालकान दिवंन लेगीत जानेवारी तें 10 एप्रील मजगती दिवचल तालुक्यांत मायणा फेरी जेटी लागी. तिसवाडी तालुक्यात गवंडाळी, फोडे तालुत्यांत वळपय फेरी धक्क्या लागी, सावयवेरें, घाणो, वाघुर्मे, बिडरूख आनी खांडोळें वाठारांत व्हडा प्रमाणात रेंव काडपाचे काम सुरू आशिल्ल्याची म्हायती याचिकादारान खंडपिठाक दिली. तेन्ना संबंदीत पुलीस अधिकाऱ्यांचेर कसली कारवाय करतले अशें पुलीस म्हासंचालकाक विचारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
