भांगरभूंय | प्रतिनिधी
मुख्यमंत्रीः बेकायदो कृत्यांतल्या आरोपींचेर खर कारवायेचे पुलिसांक निर्देश
भांगरभूंय I प्रतिनिधी
पणजी : बंदखण म्हानिरिक्षकपदाची जापसालदारकी हाचे मुखार पुलीस अधिक्षका कडेन दितले. बंदखणींत सुरू आशिल्ले बेकायदो प्रकार आडावन थंय नवी वेवस्था तयार करपा खातीरूच हो निर्णय घेतिल्ल्याचे मुख्यमंत्री डॉ. प्रमोद सावंत हांणी मंगळारा पत्रकारां कडेन उलयतना सांगलें.
हाचे पयलीं गोंय नागरी सेवेंतल्या अधिकाऱ्यांची बंदखण म्हानिरिक्षकपदार नेमणूक जाताली. हाे नेम बदलून आतां पुलीस अधिक्षक पदा वयल्या अधिकाऱ्याची ह्या पदार नेमणूक करून बंदखणींतलो कारभार सुरळीत करतले, अशें मुख्यमंत्र्यान म्हणलें.
बंदखणींतल्या कैद्यांच्या खावपा-जेवणाच्या ते हेर सगल्या प्रकाराची वेवस्था बदलतले. कैद्यांक विवीध कामांचें प्रशिक्षण, तांच्या वैजकी उपचारा खातीर दोतोर, योग, दूद सारक्यो नव्यो गजाली बंदखणींत सुरू करतले. ह्या सगल्या गजालींचेर बंदखण म्हानिरिक्षपदार नेमणूक जावपी पुलीस अधिक्षकाचे नियंत्रण आसतले, अशेंय तांणी नमूद केले.
मजगतीं, फाटल्या कांय दिसांत राज्यांत ड्रग्स, खून, बलात्कार ह्या सारक्यो घडणुको मोट्या प्रमाणांत वाडल्यात. पुलिसां कडल्यान कारवायेची मोहीम 24 वरां सुरू आसली तरी अशा प्रकाराचे ल्हान-व्हड गुन्यांव वाडतूच आशिल्ल्यान थळाव्यां मदीं भिरांत पातळ्ळ्या. हीच संद सादून विरोधी पक्षांनीय राज्य सरकाराचेर खर टिका केल्या. ताका लागून सगल्या प्रकाराचे गुन्यांव आडावपाक थेट खर पावलां उखलचीं, तशेंच अशा प्रकरणांतल्या अारोपींक थेट बंदखणींत घालपाचे आदेश मुख्यमंत्र्यान सोमारा घेतिल्ले बसकेंत पुलिसांक दिल्यात.
ड्रग्सा आड पुलिसांनी सुरू केल्ल्या धडक कारवायांक येस मेळटा, अशें दिसून आयला. ताका लागून अशा प्रकाराच्या कारवायांत वाड करपाची सुचोवणी मुख्यमंत्र्यान पुलिसांक दिल्या.
गुन्यांवांनी अटक जावपी बिगर गोंयकार चड
फाटल्या कांय दिसांनी राज्यांतल्या गुन्यांवांनी वाड जायत आसा. पूण भायल्या राज्यांतल्यान येवन गोंयांत गुन्यांव करप्यांचें प्रमाण हातूंत चड आशिल्ल्याचे स्पश्ट जाला. गोंय पुलिसां कडल्यान गुन्यांवांचेर नियंत्रण दवरपाचें यत्न झुजा पांवड्यार सुरू आसात. ताका लागून जायत्या गुन्यांवांतल्या गुन्यांवकारांक 14 ते 72 वरांत अटक जाता, अशें मुख्यमंत्री डॉ. सावंत हांणी म्हणलें. कुडचडें फारपेट प्रकरणाचो तपास पुलिसां कडल्यान योग्य पद्दतीन सुरू आसा, अशेंय तांणी स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
