भांगरभूंय | प्रतिनिधी
खांडोळ्यां महागणपती देवळांतले 10 लाखांचें अलंकार फारायले
तिस्क-उसगांवां एटीएम मशीन फोडून 13 लाख फारायले
कुंकळये-म्हाड्डोळा दुकान फोडपाचो यत्न
राज्या भायली चोरांची टोळी सक्रीय जाल्ल्याचो दुबाव
फोंडें: खांडोळ्यां महागणपती देवळांतले अदमाशेक 10 लाख रुपयां परस चड अलंकार आनी तिस्क-उसगांवां दोनां मदलें एक एटीएम मशीन फोडून अनवळख्यांनी सुमार रोख 13 लाख रुपया फारायले. तशेंच कुंकळयें-म्हाड्डोळा गुरुदास कुट्टीकार हांच्या दुकानांत चोरयेचो यत्न केल्ल्यान वाठारांत एकूच खवदळ पडला. चोरये खातीर वापरिल्ल्यो दोन दुचाकी कुंकळयें गुरूदास कुट्टीकार हांच्या घरा कुशीक जाल्यार एक दुचाकी गोडकिरे प्रियोळा सांपडली. चोरी करपा खातीर राज्या भायली टोळी सक्रीय जाल्ल्याचो दुबाव उक्तायतात. फोंडें पुलीस स्टेशनाचे उपअधिक्षक सीएल पाटील हांच्या मार्गदर्शना खाला निरिक्षक विजयकुमार चोडणकार अदीक तपास करतात.
खांडोळ्यां नामनेच्या महागणपती देवस्थानाच्या मुखेल दाराची खिळी तोडून अनवळखी चोरांनी देवळांत प्रवेश केलो. देवळांतली फंडपेटी फोडपा बरोबरूच गर्भकुडींत मुर्तीचेर आशिल्ल्यो भांगराच्यो आनी रुप्याच्यो वस्ती फारायल्यो. फंडपेटयेंतली रक्कम अनवळख्यांनी देवळा भायर उडयली. तशेंच कांय रुप्याचीं आयदनां लगीत देवळा भायर उडयलीं.
बिरेस्तारा सकाळीं 7 वरांचेर देवळाचे पुरयत देवळांत आयले उपरांत तांकां मुखेल दार उक्तें आशिल्ल्याचें दिसून आयलें. तांणी रोखडेंच देवस्थान समितीचे अध्यक्ष प्रीतम खांडेपारकार हांकां म्हायती दिले उपरांत पुलिसांक आपयले.
प्रीतम खांडेपारकारान दिल्ले म्हायती प्रमाण देवळांतले सुमार 10 लाख रुपयां परस चड भांगराच्यो आनी रुप्याच्यो वस्ती अनवळख्यांनी फारायिल्ल्याचो दावो केला. देवळांत बसयिल्ल्या सीसी कॅमेरेय फारायिल्ल्यान पुलीस तपासांत आडमेळीं निर्माण जाल्या. वास घेवपी सुण्याक तशेंच ठसे तज्ञाक आपोवन तपासणी केली.
तिस्क उसगांवां एचडीएफसी आनी कॅनरा बँकेचें एटीएम मशीन फोडून सुमार 13 लाख रुपया फारायले. चोरांनी चोरून व्हेल्लें मशीन बायपास रस्त्याचे कुशीक आशिल्ल्या झोपांत दिसून आयलें. तिस्क-उसगांव वाठारांत आशिल्लीं एटीएम मशिनां हाचे पयलीं खूबशे फावटी चोरपाचो यत्न केल्लो. बुधवारा रातीं अनवळखी 4 व्यक्ती एटीएम मशिना कुशीक सीसी कॅमेऱ्यांत दिसून आयल्यात. एक बायल लेगीत सीसी कॅमेऱ्यांत दिसून येत आशिल्ल्याचें पुलीस तपासांत उक्तें जालां. अनवळख्यांनी चोरये खातीर मडगांव सावन जीए 09 ए 0324 क्रमांकाचे मारुती ओमनीचो वापर केला. ही ओमनी मडगांव सावन चोरून हाडिल्ली. ते विशीं मडगांव पुलीस स्टेशनांत कागाळ केल्ली. गोंयांत चोरी करपा खातीर हेर राज्यांतले गँग दाखल जाल्ल्याचो दुबाव उक्तायतात.
कुंकळयें-म्हाड्डोळा घरा मुखार आशिल्ल्या दुकानांत रातीं 3 वरांचेर अनवळखी मनीस उलयत आशिल्ल्याचें दुकानदार गुरुदास कुट्टीकार हांच्या लक्षांत आयलें. तांणी आपल्या कुटुंबाक जागे करून घराचें मुखेल दार उक्तें करतकूच दुकानांतल्या फ्रिजांत आशिल्ल्यो बाटल्यो काडून चोरांनी घर धनयाचेर मारल्यो. हातूंत गुरुदास कुट्टीकार हांच्या हाताक एक बाटली लागून ते जखमी जाले.
दुकानदाराचे घरचीं सगलीं जागीं जाल्ल्याचें कळटकूच अनवळखी चोरांनी दुचाकी थंयच सोडून धांव मारली. दुकानदाराच्या घरा कुशीक पुलिसांक जीए 08 क्यू 8766 आनी एमएच 07 जे 9360 ह्यो दोन दुचाकी दिसून आयल्यो. तशेंच गोडकिरे प्रियोळा लेगीत एक दुचाकी बिरेस्तारा सकाळ सावन रस्त्याचे मदेकांत दिसून आयिल्ल्यान ही दुचाकी चोरांचीच आसपाची शक्यताय उक्तायतात. पुलिसांनी तिनूय दुचाकी ताब्यांत घेतल्यात.
वेलींग-प्रियोळ वाठारांत बुधवारा दनपारां 3 वरांच्या सुमाराक दोन सुवातींनी रस्त्या वयल्यान चलून वचपी दोन बायलांच्या गळ्यांतलें मंगळसुत्र फारायिल्लें. उपरांत बुधवारा रातीं कुंकळयें वाठारांत दुकानदार गुरुदास कुट्टीकार हांच्या दुकानांत घुसून दुकानदाराचेर बाटल्यो मारून जखमी केलो. ते खातीर वेलींग प्रियोळ वाठारांत भिरांतीचें वातावरण पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
