भांगरभूंय | प्रतिनिधी
दमट हवामान, उण्या दाब्याच्या पट्ट्याचो परिणाम
भांगरभूंय । प्रतिनिधी
पणजीः दमट हवामान आनी उण्या दाबाच्या पट्ट्याक लागून आयतारा वरीच सोमाराय हवामान दमट आशिल्लें. तामिळनाडू आनी कर्नाटकांत तयार जाल्ल्या उण्या दाब्याच्या पट्ट्याक लागून मंगळार सावन तीन दीस पडपाचो अदमास आसा. गोंयांत कांय वाठारांनी फुडले तीन दीस पावस पडटलो, असो अदमास हवामान खात्यान उक्तायला.
दमट हवामान आनी पावसाक लागून शिंयाचें प्रमाण खूब उणें जालां. फाटल्या सप्तकांत शिंयाचें प्रमाण वाडपाक सुरवात जाल्ली. हवामानांत बदल जाल्ल्यान हवामान दमट जालें आनी शिंयाचें प्रमाण देंवलें. आयतारा गोंयांत चडशा वाठारांनी पावस पडिल्लो. आयतारा सरासरी 5.4 मिमी. पावसाची नोंद जाल्या. तडवो पावस 112.9 मिमी जाला. हें प्रमाण 42.8 टक्के उणें आसा.
म्हापशें वाठारांत सगळ्यांत चड 9.1 मिमी पावसाची नोंद जाली. पेडणें, फोंडें, पणजी, पोरणें गोंय, सांखळी, वाळपय, काणकोण, दाबोळी, मडगांव, मुरगांव, केपें आनी सांगें ह्या वाठारांनी पावसाची नोंद जाल्या. म्हापशें उपरांत फोंडें, मडगांव आनी पणजी वाठारांत पावसाचें प्रमाण चड आशिल्लें.
सप्टेंबरांत मोसमी पावस सोंपता आनी ऑक्टोबरा सावन तडवो पावस सुरू जाता. अंदूं ऑक्टोबर सोंपपाक मान्सून परतून वचपाक सुरू जालो. दिवाळी मेरेन तडवो पावस पडटालो. दिवाळे उपरांत पावसाचें प्रमाण सामकें उणें जालें. नोव्हेंबरांत शीं पडपाक सुरवात जाली. डिसेंबराचे सुरवेक लेगीत शीं पडलें, आतां चडांच चड तापमान 30 ते 31 अंश जाल्यार उण्यांत उणें तापमान 23 ते 14 अंश मेरेन आसा. डिसेंबरांत उण्यांत उणें तापमान 20 अंशा मेरेन गेल्लें. फाटल्या दोन दिसांत दमट हवामानाक लागून तापमानांत वाड जावपाक लागल्या. उत्तर तामिळनाडू, दक्षीण कर्नाटक आनी केरळ दर्यादेगेर उण्या चक्रीवादळाचो पट्टो तयार जाला. ह्या पट्ट्याक लागून कर्नाटक तशेंच केरळ वाठारांत उण्या दाबाचो पट्टो आसा. हाका लागून गोंयांत दमट हवामान आसा. 13, 14 आनी 15 डिसेंबराक कांय वाठारांनी पावस पडपाची शक्यताय आसा, अशें पणजी हवामान खात्याचे शास्त्रज्ञ राहुल एम. हांणी सांगलां.
16 डिसेंबरा उपरांत परतून शीं
हेर राज्यांचे तुळेंत गोंयांत शिंयाचें प्रमाण खुबूच उणें आसता. उत्तर भारतांत शिंयाचो कुडकुडो सुरू जाले उपरांत थंयच्यान येवपी वाऱ्या वांगडा गोंयांत शीं पावता. तें शीं जानेवारी मेरेन पडटा. सध्याचें गोंयांतलें दमट हवामान पयस जाले उपरांत 16 डिसेंबरा सावन परतून शीं पडपाक लागतलें, अशी म्हायती राहुल एम. हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
