भांगरभूंय | प्रतिनिधी
सदानंद तानावडे: लोकां मदीं करतले लोकजागृती
पणजी: बिरेस्तार 11 आनी शुक्रार 12 ऑगस्ट दिसा भाजपा कार्यकर्त्यां वतीन सगल्या मतदारसंघांनी लोकां खातीर राष्ट्रीय बावट्याचें (तिरंगो) वांटप करून लोकजागृती करतले. आयज (बुधवारा) पंचायत वेंचणुको आशिल्ल्यान गांवांगांवांनी तिरंग्या विशीं जागृताय केल्ली ना. 11 आनी 12 ऑगस्ट दिसा सगल्यांक तिरंग्याचें वांटप करतले आनी 13 ते 15 ऑगस्ट अशे तीन दीस सगल्या लोकांच्या घराचेर तिरंगो हुबतलो अशें भाजपाचे प्रदेशाध्यक्ष सदानंद शेट तानावडे हांणी काल (मंगळारा) पणजेंत आयोजीत केल्ले पत्रकार परिशदेंत सांगलें.
ह्या वेळार तांचे बरोबर महसूल मंत्री बाबूश मोंसेरात पणजीचे म्हापौर रोहीत मोंसेरात आनी भाजपाचे हेर फुडारी हाजीर आशिल्ले.
काल मंत्री बाबूश मोंसेरात हांणी सदानंद तानावडे हांचे हाजिरेंत पणजी म्हानगर पालिकेच्या सगल्या नगरसेवकांक तिरंग्याचें वांटप केलें. पणजेंतल्या सगल्या प्रभागांनी घरा कणकणीं तिरंगो दितले. देशाच्या अमृत महोत्सवा निमतान तीन दीस तिरंगो लोकांच्या घराचेर हुबतलो. भाजपाचे कार्यकर्ते लोकांक तिरंगो वांट्टले. हांगा खंयच भाजप पक्षाचो प्रचार आसचो ना. भारतमातेच्यो घोशणा दिवन प्रभात फेरी, मशाल मिरवणूक, बायक रॅली सारक्यो कार्यावळी जातल्यो. घरांतल्या ल्हान भुरग्या कडल्यान बावटो लावन घेवचो. जे वरवीं फुडारांत 25 वर्सांनी येवपी शतकमहोत्सवी सुवाळ्या वेळार ही याद तांकां जातली अशें सदानंद तानावडे हांणी सांगलें.
तिरंग्याचें वांटप करून आमी खंयच राजकारण केल्लें ना. तिरंगो राष्ट्राचें प्रतीक. लोकां मदीं राष्ट्र भावना निर्माण जावची ह्या हेतून सगल्या लोकांक तिरंगो दितात. पणजेंतल्या सगल्या प्रभागांनी आमी तिरंगो वांट्टले. स्वताच्या खर्चान तिरंगो लोकांक दितले. देशाच्या स्वातंत्र्याक 75 वर्सा जायत आसात. ही आमचे खातीर अभिमानाची गजाल. सगल्यांनी आपल्या घरांचेर तिरंगो हुबोवन देशाची शान वाडोवची अशें मंत्री बाबूश मोंसेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
