भांगरभूंय | प्रतिनिधी
येरादारी खात्यान दखल घेवन उपाय काडपाची गरज; लोकांची मागणी
फोंडें: फर्मागुडयेर घातक जंक्शना कुशीक अपघातांचे संख्येंत वाड जायत आसा. दर सप्तकांत वाठारांत अपघात घडत आसतात. वाठारांत म्हाविद्यालय आशिल्ल्यान विद्यार्थ्यांची गर्दी ह्या जंक्शना कडेन दिसून येता. तशेंच अवजड वाहनांची येरादारी वाडिल्ल्यान वाठारांत अपघात घडत आसून येरादारी खात्यान दखल घेवन उपाय काडचो अशी लोकांची मागणी आसा
जंक्शना कुशीक कितलेशेच अपघात घडत आसात. जंक्शना कुशीक अपघात जावन कितल्याशाच जाणांक आपलो जीव व्हगडावचो पडला. सेगीत जावपी अपघात आडावपा खातीर अजून मेरेन यत्न जाल्ले दिसून येनात. पणजे सावन येवपी वाहनां जंक्शना कडेन पावले उपरांत चालक गोंदळत आशिल्ल्यान अपघात घडटात.
पणजे सावन येवपी वाहन चालकांक जंक्शना कडेन पावले उपरांत मुखार 3 रस्ते दिसतात. एक रस्तो कदंबा बस स्टॅण्डा कडेन, दुसरो रस्तो फोंडें शारांत आनी तिसरो बायपास ढवळी मार्गान बोरी वता. सकाळीं आनी सांजवेळा वाठारांत अवजड वाहनांची गर्दी चड आसता. कामार गेल्ले कर्मचारी ह्या वेळार यो-वच करीत आशिल्ल्यान जंक्शनाचेर वानांची गर्दी चड दिसून येता. लागींच आशिल्ल्या बायपास रस्त्यार सेगीत कंटेनर रस्त्यार कोसळपाचे प्रकार दिसून येतात. जंक्शनाच्या मुखार देंवती आशिल्ल्यान अवजड वाहन चालकांक मुखा वयल्या रस्त्याचो अदमास येनाशिल्ल्यान अपघात घडत आसतात.
फोंडेंचे योगेश बोरकार हांणी घातक जंक्शना कुशीक वाडट्या अपघाता संबंदी सरकारान गंभीरतायेन लक्ष दिवपाची गरज आसा. वाठारांत व्हड संख्येन विद्यार्थी म्हाविद्यालयांत यो-वच करीत आसतात. ताका लागून एखाद्री व्हड दुर्घटणा वाठारांत घडपाची शक्यताय आसा. येरादारी खात्यान जंक्शनाची पळोवणी करून गरजेचे उपाय काडपाची गरज आशिल्ल्याचें तांणी सांगलें.
सदानंद गांवकार हांणी, सकाळीं आनी सांजवेळच्या वेळार वाठारांत वाहनांची गर्दी वाडल्या. जंक्शनाचेर हाचे पयलीं रातच्या वेळार चड अपघात घडिल्ल्याचें दिसून येतात. ताका लागून वाठारांत गरजेचो फलक लावन वाहन चालकांक सादूर करपाचो यत्न करूंक जाय अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
