भांगरभूंय | प्रतिनिधी
खबारां संस्था
मुंबयः ऋषभ पंताक डेहराडूनांतल्यान ऍरलिफ्ट केल्या उपरांत मुंबयच्या कोकिलाबेन हॉस्पिटलांत दाखल केलां. ताच्य धोपराचे दोन लिगामेंट फुटल्यात. ताची दुखापत कितली गंभीर आास आनी तो कितल्या दिसांनी मैदानार येवपाक शकता हे विशीं बीसीसीआय कडल्यान कसलीच अधिकृत म्हायती दिल्ली ना. मात मीडिया रिपोर्टां प्रमाण तो मैदानार येवपाक एक वर्स तरी लागपाची शक्यताय आसा. ह्या वर्साच्या निमाणे जावपी वन-डे वर्ल्ड कपांतूय तो खेळपाक शकचो ना.
कोकिलाबेन हॉस्टिटलाचे स्पोर्ट्स ऑर्थोपेडिक्साचे संचालक डॉ दिनशॉ पार्डीवाला हांच्या फुडारपणा खाला दोतोरांच्या पंगडान बिरेस्तारा सकाळी पंताची तपासणी केली. सूज कमी जायमेरेन एमआरआय वा शस्त्रक्रिया करचे नात. पंताच्या अस्थी बंधनाची गंभीर झीज जाल्या. पुराय बरो जावपा खातीर तांका 8 ते 9 म्हयने लागतले. आयपीएलाचो अध्यक्ष अरूण धुमल हांणी आमी ऋषभाची सगळे तरेन जतनाय घेतले अशें सांगलें.
ऋषभ बेगीन बरो जावचो तशेंच ताचेर सारकें लक्ष दवोरपा खातीर ताका मुंबयत हाडलां. डेहराडूनाक तें शक्य जावपाचें नाशिल्ले. मुंबय ताका कडक बंदोबस्तांत दवोरलां. फकत घरचेचे लोक ताका मेळपाक शकतात. ऋषभाक शस्त्रक्रिये खातीर घडये लंडनाक व्हरतले. ताच्या धोपराचेर आनी घोट्याचेर शस्त्रक्रिया करची पडटली. ताका लागून तो णव म्हयने खेळपाक शकचो ना अशें एका अधिकाऱ्यान सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.