भांगरभूंय | प्रतिनिधी
मनीस आयुश्यभर जोडपा खातीर मरता. ताका लागून तो आयुश्यभर भलायकेची जतनाय घेवन पयशे जोडटा….. आनी जाण्टेपणांत मेळिल्ले पयशे तो आपले कुडीची देखरेख आनी दुरुस्ती खातीर खर्च करता. फेरी सोंपतकच व्हडलें शून्य उरता. एक मनीस आपलें पुराय जिवीत केन्नाच मरचो ना, अशें तरेन जियेता आनी आपलें पुराय जिवीत केन्नाच जियेवंक नाशिल्ले भशेन मरता. जिविताच्या ह्या फकांडां खाला मनशाक पावला पावलार जायतीं मरणां सोंसचीं पडलीं तरी ताची सासणाची जियेवपाची इत्सा उणी जायना.
पळयात देवाची लीला कितली अगाध आसा. म्हज्या मतान, मनशाची खरी येणावळ कितें? तर ताच्या मरणा उपरांत निमाण्या संस्काराक जमिल्ली गर्दी. पूण, खरी येणावळ पळोवपाक तो हाजीर नासता. एका फोंडकुलांत आराम करता, स बाय दोन मिटर लांब फोंडांत वा लासून गोबर जाता… आनी हो डाव केन्ना मोडटलो, तें कोणूच सांगपाक शकना… आनी तीच खरी मजा. पूण, देवान एक बरें काम केलां तें म्हणल्यार ताका हांगाची कसलीच मालमत्ता पेन ड्रायव्हांतल्यान आपले वांगडा व्हरपाची सुविधा दवरुंक ना.
अनंतांतल्यान अनंतांत वचपी प्रवासांतलो एक थांबो म्हणल्यार जिवीत. आमी कितलीं पावलां उखलल्यांत हाची आमकां कल्पना ना…. आमी कितले पयस वचचें पडटलें हाची आमकां कल्पना ना. आमचें जिवीत सकाळीं, सांज मेरेन जिणेचो एक नित्यनेमूच आसा. हो प्रवास एकटो करताना तुमकां एकसुरेपणाची भावना जावची न्हय म्हणून तुमच्या जिवितांत कांय साथीदार रोयल्यात – हे सगळे साथीदार त्या खिणाचे वांगडी जावन आयल्यात. सावळी दिवपी एक झाड आसा. सांत्वनाचीं दुकां व्हांवोवपी दोन इश्ट आसात. कोण तरी सौम्य हातान पांयांतलो कांटो काडून उडयता.
जिवीत म्हळ्यार तुमची फुडली गाडी येय मेरेन वेळ काडपाक एक वाट पळोवपाचो कक्ष. तुमकां वाट पळोवपाची ही कूड कितलीय आवडली तरी गाडी येतकच ती सोडून वच्चेंच पडटा… ह्या वेटिंग रूमाची मना सावन कदर करपाक जाय. आमकां इतली सोबीत सरबराय दिवपी ती कूड निर्माण करपाक प्रत्यक्ष वा अप्रत्यक्षपणान हातभार लावपी ल्हान- व्हड सगळ्या कारागिरांच्या रिणांत आमी रावपाक जाय.
वेटिंग रूमांतले सगले बरे- वायट वांगडी आनी तांच्या सांगातांतले सगळे गोड- कडू अणभव केन्नाच सोंपनात. खरें म्हणल्यार ताकाच लागून फुडलो नवो प्रवास तयार जाता. ताका आगळी रुच येता. तेन्ना ह्या वेटिंग रूमांतलो वेळ हांसत खेळत सारपाक जाय. ह्या काळांत कोणाक मदत करपाक मेळटा जाल्यार कितें तरी करचें. समाजाक कितें तरी दिवचें. उण्यांत उणें जिणेच्या वेटिंग रुमांतल्या प्रवाशांक कसलीच असुविधा जावची न्हय, हाची जतनाय घेवची….. आनी सगल्यांत म्हत्वाचें म्हणल्यार तुमचें सामान पॅक करपाचें आनी सदांच तयार रावपाचें – तुमची गाडी केन्ना येतली तें तुमकां केन्नाच कळना- आनी गाडी चुकोवप कोणाच्याच हातांत ना.
गौरी भालचंद्र
942237ा3926
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
