प्रदुशण अज्रंवर आसा?

भांगरभूंय | प्रतिनिधी

साळ न्हंयेच्या प्रदुशणाचेर बेगोबेग उपाय मेळटलो, हे खातीर पालिका, पंचायती, सरकारी खातीं आनी लोकांनीय शक्य तितले बेगीन हालचाली करपाक जाय.

प्रदुशण म्हणल्यार कितें तें सगले जाणांत. पूण, विचार आनी कृती हांचो मेळ जुळना. नाजाल्यार लोक आपल्या घरांतलो कोयर दुसऱ्याच्या दारांत उडोवचे नाशिल्ले. भौशीक जाग्यांचेर बियरीच्या बाटल्यांच्यो राशी दिसच्यो नाशिल्ल्यो. रस्त्यांच्यो दोनूय देगो नितळ आसपाच्यो. मागीर दरवर्सा नितळसाण मोहीम चालीक लावपाची गरजूच पडची नाशिल्ली. हालींच साश्टींतल्या साळ न्हंयेंत सिवरेज तशीच सोडटात, अशें दिसलें. बाणावलेच्या आमदारान बोवाळ घालो आनी सरकारी यंत्रणेक जाग आयली. बांदकाम मंत्री निलेश काब्राल हांणी हाचे मुखार मलनिस्सारण आराखडो नासल्यार बांदकामांक उदकाचें कनेक्शन दिवचे नात, अशें जाहीर केलां. येवकार. फक्त उदकाचें कनेक्शनूच न्हय, तर हेर कसलेच दाखले दिवंचे न्हय. इमारती उब्यो जातात. थंय मैदान नासता, पार्किंगाची वेवस्था नासता, बाग नासता. उदकाची टांकी नासता…. सिवरेजीची गजालूच विसरात. गांवांनी एकवेळ हें चलता, पूण न्हय शारांत. आतां प्रदुशणाक आळाबंद हाडपाक सरकार खर पावलां उबारतलें अशें काब्राल हांणी म्हणलां. मात ही पाटल्यांतली नवी घोशणा थारची न्हय. पाटलो मात्सो हालोवचो. म्हणटकच हाचे आदीं सरकारी मळाचेर कितल्यो घोशणा जाल्यात त्योय दिसतल्यो. काब्राल हांणी प्रदुशणाचें मनार घेवन नेम पाळीनात तांचेर आस्वासन दिल्ले प्रमाण कडक कारवाय करची.
घाणयाऱ्या उदकाचेर प्रक्रिया करपी प्रकल्प बाणावले सुरू जाला, पूण लोकांचें फक्त दोनूच अर्ज आयल्यात. हाचे वयल्यान लोकांक हे विशीं एक तर म्हायती आसची ना, ही प्रक्रिया कटकटीची आसतली नाजाल्यार ताचें गांभीर्य लोकांक खबर आसचें ना. देवान दवरल्यात तशेच रावया म्हणपीय आसतले. खरें म्हणल्यार दरेके पंचायत, पालिकेन हे खातीर फुडाकार घेवपाक जाय. पूण न्यायालयान 4- 4 फावटीं सांगूनय कोयरा प्रकल्प उबारिनात, ते मंत्री सांगता म्हूण घाणयारें उदक प्रक्रिया प्रकल्प उबारतले, हाची खात्री ना. हे बाबतींत लोकांनीय फुडाकार घेवंक जाय. कोयराचेंच उदाहरण घेयात, इतलो प्रचार करून पसून सुशिक्षीत लोक रातचे वा फांतोडेर वचून रस्त्या कुशीक कोयर उडोवन येतात. हातूंत कांय वेवसायीकूय आसतले. मागीर गोरवां, सुण्यांचो पोटा भुकेक सांवार. तांकां लागून अपघात जावन लोकांक मरण पसून आयलां. मात, कोयर उडोवप…….. चालूच आसा!!
साळ न्हंयेच्या प्रदुशणाचेर बेगोबेग उपाय मेळटलो, हे खातीर पालिका, पंचायती, सरकारी खातीं आनी लोकांनीय शक्य तितले बेगीन हालचाली करपाक जाय. फाटीं न्हंयांचें राष्ट्रीयीकरण जातलें अशी घोशणा जाल्ली, तेन्ना लोकांनी धडाधड हालचाल केल्ली. आंदोलनां जाल्लीं…. ती उमेद आतां कित्याक दिसना? साळ न्हंयेंत सिवरेज सोडटाले, ती बंद जावचीच, पूण हेर न्हंयांनी कोण हें कर्म करता, जाल्यार ताचोय तपास जावचो. पणजे शारांत सांतिनेज व्हाळ, गटार काय खारीज आसा. थंयचें उदक सदांच बुरशें. ते नितळ करपाक अदीं मदीं पयशे खर्च करतात. पूण तें 10 टक्के पसून निवळना. कोण कारण सोदीत? फक्त सिवरेजूच न्हय, तर न्हांवपाचें, आयदनां- कपड्यांचेंय उदक न्हंयो, व्हाळांनी सोडटात. तें जमनींत फोंड काडून जिरोवप शक्य ना?
कोयर उडयल्यार अमूक दंड, हो नेम मोडल्यार तो परवानो रद्द… अश्यो घोशणा करून उपकारना. त्यो चालीक लागपाक जाय. सुंदर घोशणा, नेम जाहीर जातात. मागीर कोण तरी आपलो सुवार्थ पळोवन मदीं पांय घालता वा खुद्द लोकप्रतिनिधीच मतदार बेजार जातले, ह्या भंयान फाटीं सरतात. ताका लागून समस्या तशीच धुंवरेत उरता. अशे मोव रावल्यार बेशिस्त लोक मागीर माथ्यारुय बसतात. समाजाच्या बऱ्या खातीर आसा, तें सगलें बेगीन चालीक लागूंक फावो.
आयज दुडुर्र ब्रह्मा, दुडुर्र विष्णू…. आसल्यार मनांत येता तें करप शक्य आसा, अशी थोड्या लोकांची भावना जाल्या. तातूंत मात्तूय तथ्य ना, अशें म्हणपाक मेळचें ना. कांय कडेन लोकप्रतिनिधींचो वरदहस्त आसता. म्हणटकच सरकारी यंत्रणां ह्या घाणयाऱ्या उदकाकारांच्या केंसाक पसून धक्को लावपाक शकनात. हे आशिर्वादाचे हात जेन्ना फाटीं सरतले, तेन्नाच चुकीच्यो गजाली ना जातल्यो. प्रदुशण करपी आनी ताचे कडेन आडनदर करपी दोगांयचेर दोळो दवरचो पडटलो. तांच्या पापांत कोण कोण वांटेकार आसात तें बेगोबेग सोदचें. ना तर फाल्यां सगलेच हात वयर काडून कुशीक सरतले. सिवरेज लायनी मात आसा थंयच उरतल्यो. न्हंयो बुरश्यो करीत चिरंतन व्हांवतल्यो.