पोरण्यां कदंबांक लागून प्रवाशांक त्रास
भांगरभूंय | प्रतिनिधी
पेडणें, प्रतिनिधी: प्रवाशांक त्रास जावचे न्हय आनी तांचे बरे वेवस्थे खातीर सरकारान पेडणें म्हालांत सगळे कडेन कदंब बसी सुरू केल्यात. पूण त्यो पोरण्यों आशिल्ल्यान केन्ना वाटेर बंद पडून लोकांक तशेंच विद्यार्थ्यांक ताचो त्रास जायत हें सांगूंक येना.
पेडणें म्हालांत व्हडा प्रमाणांत खाजगी बसी आशिल्ल्यो त्यो कोरोना काळांत बंद पडिल्ल्यान लोकांक कदंब बशींचोच आदार घेवचो पडटा. ह्यो बसी पेडणेंच्या कांय मुखेल गांवांतल्यान वतात. पूण केन्ना केन्ना बंद पडटात. हाची दखल घेवन कदंब महामंडळाचे चेअरमन उल्हास नायक तुयेंकार हांणी हाचेर कितेंय उपाय करून कदंब म्हामंडळान बर्यो बसी ह्या भागांत धाडच्यो अशी मागणी हांगाच्या नागरिकांनी केल्या.
कदंब महामंडळाची बस जीए ०३ एक्स ०२६८ ही बस पणजे मार्गांत पेडणें कोरगांव व्हाया हरमल केरी वतना कोरगांवां आयज दनपरां टायर पंचर जाल्ल्यान बंद पडली. ताका लागून प्रवाशांक अर्द्यारूच देंवचें पडलें. कांय प्रवासी चलत गेले. कांय जाणांनी लिफ्ट मागून फुडलो प्रवास केलो. कदंब बसीचो पंचर जाल्ले टायर काडपा खातीर तांचे कडेन यंत्रणांय नाशिल्लीं.
पूण कंडक्टर आनी वाहन चालकांकडेन संपर्क केलो तेन्ना जे बसींत प्रवासी आसात तांकां पावपाक स्कुलाची बस धाडटले अशी म्हायती तांणी दिली. पेडणें म्हालांत ह्यो आदल्यो बसी मुद्दाम धाडल्यात काय कितें? बस बंद पडल्या उपरांत प्रवाशांक जो त्रास जाता ते कशे भरून येतले? अशे प्रस्न ह्या वेळार प्रवाशांक पडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
