भांगरभूंय | प्रतिनिधी
आपूण जें कितें करता वा सांगता तें उथळ वा सवंगपणाचें थारचें न्हय हाची जतनाय घेतलीना जाल्यार फुडें लोकांक जाय तें उलोवपाची संद मेळटा. आपूण जें कितें करपाक पळयतां ताचे वयल्यान लोक आपली धजा उडोवचे नात मूं, हाचो विचार करता तोच खरो शाणो. विचार वा कृती तर्कसंगत आसल्यार ती लोकांक रोखडीच पट्टा, नाजाल्यार आपलीं उतरां म्हणल्यार फकत भायर सोडिल्लो पोकळ वारो थारपाक वेळ लागना.
येरादारी मंत्री माविन गुदिन्हो हांणी रस्तो सुरक्षा सप्तकाच्या उक्तावणा वेळार उलयतना पयर एक घोशणा केल्या. सोरो पियेवन टायट जाल्ल्या तळीरामांक तांच्या घरा व्हरून पावोवपाची जापसालदारकी बार आनी रेस्टॉरंट धनयांचेर घालपी कायदो करचो, हे खातीर ते खंय यत्न करतले. तांणी ही जी घोशणा केल्या ती पोकळ वारोच थारपाची चड शक्यताय. कांय म्हयन्यां पयलीं हो कायदो जावपाचो आसा, अशें छापून आयिल्लें.
कार्यावळींत उलयतना मुखार गर्दी दिसली काय कसली तरी घोशणा करपाक जाय म्हूण वयलेचाराक केल्ली ही घोशणा, अशेंच म्हणचें पडटा. राज्याचे मंत्री आयज मेरेन घोशणा करीत आयल्यात, करीत आसात आनी मुखारुय करतले. पूण ती केले उपरांत बरेच जाण आपलें दायित्व विसरतात. ‘पीपल्स मेमरी इज शॉर्ट’ म्हणटकीच लोकूय थोड्या तेंपान तें सगळें विसरतात… मागीर मंत्री दुसरी घोशणा करपाक मेकळो!! सोरो पियेवन वाहनां चलयल्यार अपघात जावपाची शक्यताय आसा, हें कोणूच न्हयकारचो ना. ही शक्यताय जायते फावटी खरीय थारल्या. म्हणून सरसकट जे अपघात जातात ते खातीर सोरो पियेल्ल्यांक बोल लावपाची वृत्ती म्हणल्यार आपले वयली जापसालदारकी दुसऱ्याचेर फाफडून आपूण नामानिराळो रावपाची एक क्लृप्ती.
गोंयांत सोऱ्याच्यो न्हंयो व्हांवतात. पर्यटनाच्या नांवा खाला सरकारूच नवी बार्रा उगडपाक परवाने दिता. सोरो इतलो मेकळेपणान पियेवपाक मेळटा जाल्यार लोक तो पियेवपाक फाटीं कशे रावतले? देशी पर्यटक गोंयांत येतात ते फक्त गोंयचें सैम, सोबितकाय पळोवपाक असो एक समज कांय जाणांनी करून घेतला. पूण, चडशे पर्यटक (सगलेच न्हय) हांगां येतात तो गोंयांत मेळपी सवाय सोरो पियेवपाक आनी वतना दोन- चार बाटल्यो घरा व्हरपाक. सैम सोबितकाय ते ज्या राज्यांतल्यान येतात थंय लेगीत आसता. मात, गोंयच्या सैमाक वांगड आसा तो आशिकुशीक पातळिल्ल्या बार्र संस्कृतीचो. तातूंत आतां तिका घुंवळे वखदांचोय वांगड मेळपाक लागला. राज्यांत आसात ते बार खूब जाले. पुरो. हाचे फुडें ते सुरू करपाक परवाने दिवप बंद करतले, अशें माविनबाबान सांगिल्लें जाल्यार ते तर्कसंगत थारपाचें.
रस्त्यांनी अपघात जावपाक जायतीं कारणां आसात. सोरो पियेवन वाहनां चलोवप हें तातूंतलें एक कारण आसत, पूण बाकीच्या कारणांचें कितें? ते विशीं कितें करतले हें सरकारी यंत्रणेन सांगपाक जाय. भौशीक येरादारीचेर कोणाचें लक्ष ना, म्हूण खाजगी वाहनां हिस्पाभायर वाडल्यांत. सीसीटीव्ही बसोवन ते 24 वरां चालू दवरल्यार वाहनां कोण वेगान चलयतात तें सोदून काडप शक्य आसा. सध्या रस्त्यांची जी आवतिकाय जाल्या ताचेर सरकारा कडेन कसलो उतारो आसा, हें लेगीत फुडाऱ्यांनी सांगपाक जाय.
सरकारी तिजोरेंत वेगवेगळ्या टॅक्सां खाला बार धनयांनी पयशे भरपाचे आनी आतां माविनबाब सांगतात ते प्रमाण टायट जाल्ल्यांक तांच्या घरा पावोवपाचें म्हणल्यार अतीच जालें. कायदो करून बार धनयांचेर तशी सक्ती करपाचें माविनबाब आनी तांच्या सरकारान खंय थारायलां. हाका बार धनी कशेच तयार जावचे नात. जालेय जाल्यार जो बेबदो (?) पिवपाक येता, ताका टॅक्सीन घरा पावोवचें पडटलें हें गृहीत धरून ते टॅक्सीचें भाडें ताच्या सोऱ्याच्या बिलांतल्यान वाशील करून घेवचे नात कित्या वयल्यान? हो सगळो द्राविडी प्राणायाम करचे परस खावपाचे हेर जिनस मेळटात ते भशेन सोऱ्याची होम डिलिव्हरी सुरू करपाक कित्याक परवानगी दिवची न्हय? ती केल्यार रस्त्या वयले अपघात उणे जातलेच. त्या भायर पासयेक वता म्हूण सांगून बार्रांत गेल्ल्या घरकाराची वाट पळयत तिश्टूपी बायलेचो (आनी भुरग्यांचोय) हुस्को सांसणाचो सोंपयिल्ल्याचें पुण्यय मंत्र्यांक मेळटलें. रस्तो सुरक्षा सप्ताहाच्या समारोप सुवाळ्यांत भोवमानेस्त येरादारी मंत्र्यान तशी घोशणा करपाक हरकत ना….
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
