भांगरभूंय | प्रतिनिधी
खबरां संस्था
अल रायनः पोरूं उप जैतिवंत थारिल्ल्या क्रोएशिया कडल्यान पेनल्टी शूट आवटांत हार खावची पडिल्ल्यान ब्राझिलाचें संवसारीक फुटबॉल सर्तींतले आव्हान सोपलें. ब्राझिलाचो स्टार खेळगडो नेयमारान हे मॅची मजगतीं ब्राझिला कडल्यान सगल्यांत चड गोल करपाच्या पेले हांच्या विक्रमा कडेन बोरोबोरो केली. मात पंगडाक हार खावची पडिल्ल्या ताच्या पदरांत निर्शेणी पडली. तशेंच पंगडाक संवसारीक वस्ताद करपाचें ताचें सपन अर्दवट उरलं. ताका लागून मैदाना भायर वतना ताच्या दोळ्यांतल्यान दुकां व्हांवपाक लागली.
नियमीत वेळांत दोनूय पंगड गोल करपाक शकले नात. अतिरिक्त वेळांत नेयमारान गोल करून ब्राझिलाक आघाडी घेवन दिली. ब्राझिला खातीर नेयमाराचो हो 77वो गोल थारलो. ताका लागून ताणे दिग्गज फुटबॉल खेळगडो पेले हांच्या विक्रमाची बोरोबोरी केली. मात ताका पंगडाक जैत मेळोवन दिवपाक मेळ्ळें ना. अतिरिक्त वेळार 1-1 अशी बोरोबोरी जाल्या उपरांत जाल्ले पेनल्टी शूट आवटांत ब्राझिलाक क्रोएशिया कडल्यान 2-4 गोलांनी हार खावची पडली. नेयमाराक पेनल्टी मारपाची संद लेगीत मेळ्ळी ना.
पेले कडल्यान परबीं
ब्राझिला खातीर सगल्यांत चड गोल करपाच्या विक्रमा कडेन बोरोबोरी केल्या उपरांत पेलेन नेयमाराक परबीं भेटयलीं. हांवें तुका ल्हानाचो व्हड जातना पळयलां. हांका सदांचो तुका उर्बां दितालो आनी आयज ब्राझिला खातीर सगल्यांत चड गोल करपाच्या म्हज्या विक्रमा कडेन बोरोबोरी केल्ल्यान तुका परबीं भेटोवपाची संद म्हाका दिल्या. हांवें 50 वर्सा पयलीं विक्रम केल्लो. आतां मेरेन त्या विक्रमा मेरेन कोणूय पावपाक शकलो नाशिल्लो. तुजें येस कितलें व्हड हें हाचे वयल्यान दिसून येता अशें पेले हांणी इन्स्टाग्रामांतल्या पोस्टांत बरयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
