भांगरभूंय | प्रतिनिधी
पेडणें: राष्ट्रीय म्हामार्ग 66 आनी पेडणें म्हालांतल्या भितरल्या मुखेल रस्त्यांचेर व्हड प्रमाणांत हेडगीं गोरवां रस्त्यार ठाण मांडून बसतात. कांय गोरवां रस्त्या मदल्यान चलतात आनी हाका लागून येरादारीची कोंयडी जाता. तशेंच केन्ना केन्ना अपघात जावन वाहन चालकांक मरण लेगीत येता. तेच बरोबर गोरवांकूय मरण येता. हाचेर सरकारान आनी थळावे पंचायतीन योग्य ती दखल घेवची अशी मागणी भास्कर नारुलकार हांणी केल्या.
उच्च न्यायालयाच्या आदेशा प्रमाण दरेक नगरपालिका आनी ग्रामपंचायतीक हेडग्या गोरवांचो बंदोबस्त करपा खातीर कोंडवाडो उबारपा खातीर निधीची तरतूद केल्ली. पूण आयज मेरेन ह्या आदेशाची योग्य पद्दतीन अंमलबजावणी जायना. कांय पंचायती हेडग्या गोरवांक गोशाळेक दिवपाचो उपक्रम राबयतात. पूण आयजूय कांय गांवांनी रस्त्याचे मदीं आनी राष्ट्रीय म्हामार्गा वयल्यान व्हड प्रमाणांत हेडगीं गोरवां (म्हशी) चलत वतात अशें चित्र दिसून येता. हाचेर योग्य ती उपाय येवजण करची अशी मागणी जायत आसा.
ह्या गोरवांक लागून मनशाचोय जीव वता आनी गोरवांचोय जीव वता हाका लागून सरकारान आनी थळावे पंचायतीन, नगरपालिकेन जापसालदारकी स्विकारून ह्या हेडग्या गोरवांचो बंदोबस्त करचो अशी मागणी जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
