भांगरभूंय | प्रतिनिधी
गोंय लोकसेवा आयोगाची प्रस्तावाक मंजुरी
कार्मीक खातें बेगिनूच करतले आदेश जारी
भांगरभूंय I प्रतिनिधी
पणजीः गोंय पुलीस खात्यांतल्या 10 उपअधिक्षकांक अधिक्षकपदार बडटी खातीर लागपी सेवाकाळ वर्सांची अट सदळ करपाच्या प्रस्तावाक गोंय लोकसेवा आयोगान मंजुरी दिल्या. हे विशींचो आदेश कार्मीक खातें फुडल्या सप्तकांत जारी करतले. ताका लागून 10 उपअधिक्षकांच्या बडटीचो मार्ग मेकळो जातलो.
मेळिल्ले म्हायती प्रमाण, गोंय पुलीस खात्यान वरिश्ठ श्रेणी अधिकाऱ्यांच्यो (अधिक्षक) बडटी खातीर गोंय पुलीस सेवा नेमावळ 2011 प्रमाण, कनिश्ठ श्रेणी अधिकाऱ्याक आठ वर्सांची सेवा करप गरजेचें आशिल्ले. पूण नेमावळींत दुरुस्ती करून ही अट स वर्सांची केल्या. तशेंच ही 6 वर्सांची अट 10 उपअधिक्षकांच्या संदर्भांत सदळ करपाचो प्रस्ताव राज्य सरकारान गोंय लोकसेवा आयोगा कडेन धाडिल्लो. ते प्रमाण आयोगान प्रस्तावाक मंजुरी दिवन फुडले प्रक्रिये खातीर कार्मीक खात्या कडेन धाडल्या. आतां कार्मीक खातें फुडल्या सप्तकांत हे विशींचो आदेश जारी करतले.
पुलीस खात्यांतल्या मारिया मोंसेरात, नेल्सन आल्बुकर्क, सुचिता देसाय, एझिल्डा डिसोझा, सुनीता सावंत, राजेंद्र राऊत देसाय, गुरुदास गावडे आनी धर्मेश आंगले हांकां 5 ऑगस्ट 2014 दिसा, किरण पौडवल आनी एॅडव्हीन कुलासो हांकां 13 मे 2015 दिसा हंगामी उपअधिक्षकपदार बडटी दिल्ली. ते उपरांत उपअधिक्षक मारिया मोंसेरात, गुरुदास गावडे, एड्वीन कुलासो, नेल्सन आल्बुकर्क,
सुचिता देसाई, एझिल्डा डिसोझा, सुनिता सावंत आनी राजेंद्र राऊत देसाय हे अधिकारी 29 सप्टेंबर 2017 दिसा जाल्यार धर्मेश आंगले आनी किरण पौडवाल ह्या अधिकाऱ्यांक 8 मार्च 2019 दिसा नियमीत उपअधिक्षकपदार बडटी दिल्ली. ह्या 10 अधिकाऱ्यांनी नोव्हेंबर 2021त जावपी बडटी खातीर आशिल्लें प्रशिक्षण पुराय केलां. आयोगाच्या मंजुरी उपरांत वयल्या 10 अधिकाऱ्यांचो अधिक्षकपदार बडटीचो मार्ग मेकळो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
